Kynna varfærnar tilslakanir

Jón Sigurðsson Nordal

Þorgerður Anna Gunnarsdóttir

Jóhann Ólafsson

Svandís Svavarsdóttir heilbrigðisráðherra kynnti í gær tilslakanir á samkomutakmörkunum vegna kórónuveirufaraldursins sem gilda munu í þrjár vikur, frá 8. febrúar til 1. mars. Þakka má góðu gengi Íslendinga í baráttunni við faraldurinn þessar snemmbúnu breytingar, en til stóð að núgildandi reglugerð myndi gilda til 17. febrúar.

Tilslakanirnar eru byggðar, að vanda, á minnisblaði Þórólfs Guðnasonar sóttvarnalæknis og eru nokkuð varfærnar. Tveggja metra nálægðartakmörk verða enn í gildi, sem og grímuskylda í almenningssamgöngum, verslunum og þar sem ekki er hægt að halda viðunandi bili milli manna. Þá verða almennar fjöldatakmarkanir áfram 20 manns. „Þetta eru varfærin skref sem eru í samræmi við þá staðreynd að okkur gengur mjög vel hérna innanlands, en líka þá staðreynd að faraldurinn er á mikilli siglingu alls staðar í kringum okkur,“ segir heilbrigðisráðherra um tilslakanirnar.

Rýmri undanþágur

Meðal breytinga eru rýmri undanþágur frá fjöldatakmörkunum en áður hafa verið. Fjöldatakmörk gesta í sviðslistum verða aukin úr 100 í 150 manns og trú- og lífsskoðunarfélögum verður heimilt að halda athafnir, þar með taldar útfarir, með mest 150 manns. Hámarksfjöldi viðskiptavina í verslunum verður 150 manns með hliðsjón af fermetrafjölda og sama gildir um gesti á söfnum. Þá verður heilsu- og líkamsræktarstöðvum heimilt að opna búningsaðstöðu að nýju og æfingar í tækjasal verða leyfðar, að því gefnu að ekki séu fleiri en 20 manns í hverju rými. Hámarksfjöldi verður allt að 50% af leyfilegum fjölda líkamsræktarstöðvanna. Áfram þarf að skrá þátttöku fyrir fram.

Leyft að opna bari og krár á ný

Með tilkomu breytinganna mega krár, barir og skemmtistaðir hafa opið, en þó ekki lengur en til kl. 22. Sama gildir um spilakassa og spilasali. Veitingar skulu afgreiddar til gesta í sæti og ekki má hleypa nýjum gestum inn eftir kl. 21.

Þá leggur sóttvarnalæknir til að viðvörunarlitakóða vegna veirufaraldurins á Íslandi verði breytt úr appelsínugulum, sem stendur fyrir „aukna hættu“, í gulan, sem hvetur fólk til að „vera á verði“. Ráðherra bárust ekki tillögur um hertar sóttvarnaaðgerðir á landamærum Íslands, þrátt fyrir þá fullyrðingu sóttvarnalæknis að mesta ógnin stafi af landamærunum þar sem flest virk smit greinist þar í samanburði við smittölur innanlands.

Rekstraraðilar misánægðir

Ágústa Johnson, framkvæmdastjóri líkamsræktarstöðvarinnar Hreyfingar, segir tilslakanirnar vera miklar gleðifréttir. „Þetta hefur frábær áhrif á þá þjónustu sem við getum boðið,“ segir hún. Þröstur Jón Sigurðsson, eigandi Sporthússins, segir það gott að allur vafi sé nú tekinn af því hvort æfa megi í tækjasölum líkamsræktarstöðva, en að það muni langmestu að geta opnað búningsklefana á ný. Þau höfðu bæði gert sér vonir um að fleiri mættu koma saman, en dvelja ekki við það í bili. Ekki eru þó allir á einu máli um ágæti tilslakana ráðherra. „Við bareigendur erum enn mjög ósáttir með þá meðferð sem við höfum fengið og teljum að það hafi verið brotið á jafnræðisreglu,“ segir Björn Árnason sem rekur Skúla Craft Bar. Hann segist þó ánægður með að geta loksins haft opið aftur og að fá starfsfólk sitt til vinnu. Björn er í hópi bareigenda sem hyggjast höfða skaðabótamál vegna fyrri sóttvarnareglna sem neyddu vínveitingastaði til að stöðva rekstur svo mánuðum skipti. Hann vonast til að málareksturinn muni tryggja „samræmi í reglum um bari, kaffihús og veitingastaði, líkt og er í löndunum í kringum okkur“.