Stefán Gunnar Sveinsson
sgs@mbl.is
Efnt var til mótmæla gegn valdaráni herforingjastjórnarinnar í Búrma, sem einnig er þekkt sem Mjanmar, í gær eftir að herinn handtók Win Htein, einn helsta ráðgjafa Aung San Suu Kyi, leiðtoga stjórnarflokksins NLD. Suu Kyi er sögð við góða heilsu í stofufangelsi sínu, en ekki hefur sést til hennar síðan herinn lét til skarar skríða.
Um 200 kennarar og stúdentar við Dagon-háskólann í Jangon, stærstu borg Búrma, efndu til mótmælafundar og héldu þátttakendur á lofti þremur fingrum, en það er mótmælatákn sem lýðræðissinnar í Taílandi hafa tekið upp á sína arma. Stúdentarnir hrópuðu slagorð til stuðnings Suu Kyi, eða „móður Suu“, og báru rauða fána, en rauður er flokkslitur NLD-flokksins.
Rauð flögg og rauðir borðar
Win Win Maw, lektor við háskólann, sagði í samtali AFP-fréttastofuna að ef allir opinberir starfsmenn legðu niður störf yrði herforingjunum gert nær ómögulegt að stjórna landinu áfram, en læknar og hjúkrunarfræðingar víða um Búrma ákváðu fyrr í vikunni að sinna einungis neyðartilfellum í mótmælaskyni. Settu margir þeirra upp rauða borða til að sýna andstöðu sína við valdaránið.Þetta voru fyrstu stóru mótmælaaðgerðirnar í landinu eftir valdaránið á mánudaginn og dreifðust þær til annarra borga. Í höfuðborginni Naypyidaw tók fjöldi ráðuneytisstarfsmanna þátt í látlausum aðgerðum og sátu þeir fyrir á hópmyndum með þrjá fingur á lofti og rauða borða.
Undanfarin kvöld hafa svo íbúar í helstu borgum tekið til við að berja í potta og pönnur og skapa annan hávaða til þess að láta óánægju sína í ljós. Lögreglan í Mandalay, næststærstu borg landsins, brást við með því að handtaka rúmlega 20 manns fyrir að trufla friðinn og voru þeir dæmdir í gær í sjö daga fangelsi.
Skoða sértækar refsiaðgerðir
Joe Biden Bandaríkjaforseti vék í fyrstu ræðu sinni um utanríkismál í fyrrinótt að valdaráninu og fordæmdi það. Sagði hann að her Búrma ætti að gefa eftir öll völd, sleppa öllum úr haldi sem handteknir hefðu verið og létta á fjarskiptatruflunum sínum, en herforingjastjórnin lét loka fyrir Facebook í fyrradag.Bandaríkin skoða nú að beita leiðtoga valdaránsins sértækum viðskiptaþvingunum og myndu refsiaðgerðir þeirra einnig miða að því að trufla starfsemi fyrirtækja, sem tengjast hernum nánum böndum.