Áningarstaður Skýlið var vinsælt meðal heimamanna og ferðafólks.
Áningarstaður Skýlið var vinsælt meðal heimamanna og ferðafólks.
Mikið tjón Þannig var aðkoman sem blasti við starfsmönnum Skógræktarinnar er þeir komu í Hákonarlund á föstudaginn. Ekki er vitað um eldsupptök.
[ Smellið til að sjá stærri mynd ]
Ágúst Ingi Jónsson aij@mbl.is Bálskýli í Haukadal brann til kaldra kola síðastliðinn fimmtudag. Skýlið sem var reist árið 2017 var stórt og stæðilegt og stóð í Hákonarlundi í Haukadalsskógi.

Ágúst Ingi Jónsson

aij@mbl.is

Bálskýli í Haukadal brann til kaldra kola síðastliðinn fimmtudag. Skýlið sem var reist árið 2017 var stórt og stæðilegt og stóð í Hákonarlundi í Haukadalsskógi.

„Fyrst og fremst erum við þakklát fyrir ekki hafi orðið slys á fólki við svona stóran bruna en um talsvert tjón er að ræða og kostnaðurinn við byggingu svona skýlis hleypur á milljónum,“ segir Trausti Jóhannsson, skógarvörður á Suðurlandi. „Mikil mildi er að eldurinn hafi ekki dreifst víðar en veður var hagstætt, raki í jörðu og vindur hægur. Skýlið stendur úti í miðjum skógi og hæglega hefði eldur getað læst sig í skóginn og valdið gríðarlegu tjóni.“

Talið er að atvikið hafi orðið síðastliðið fimmtudagskvöld en engin tilkynning barst um brunann og urðu starfsmenn Skógræktarinnar varir við hann þegar þeir voru í eftirliti um svæðið daginn eftir, þá var enn glóð í stólpum skýlisins. Að sögn Trausta hefur enginn gefið sig fram varðandi málið en lögreglunni á Selfossi var tilkynnt um brunann strax þegar starfsmenn Skógræktarinnar urðu varir við tjónið.

Eldhafið mikið

Trausti segir ljóst að eldhafið hafi verið mikið og eldsúlan há, en skýlið var yfir fimm metra hátt og byggt úr stórviði úr skóginum. Skýlið hefur verið vinsæll viðkomustaður heimamanna úr sveitinni og ferðamanna, innlendra sem erlendra, og því mikill missir að því. Óvíst er á þessari stundu hvort það verði endurbyggt enda ná tryggingar ekki yfir svona mannvirki, að sögn Trausta. Allar ábendingar um málið má senda á trausti@skogur.is.