Skagfirskir bændur, sem gert var að skera fé sitt vegna riðu sem kom upp á svæðinu, hafa ekki fengið lögbundnar bætur frá ríkinu. Samkvæmt upplýsingum frá landbúnaðarráðuneytinu eru viðræður við bændur langt komnar.
Atvinnuvegaráðuneytið og Matvælastofnun hafa undanfarið unnið að úrlausn þessara mála í samráði við bændur, meðal annars kallað eftir athugasemdum og ábendingum varðandi drög að samningum. Í skriflegu svari frá ráðuneytinu segir að rík áhersla sé lögð á að ljúka þessum viðræðum sem allra fyrst og er gert ráð fyrir að þeim verði flestum lokið í næstu viku.
Riða greindist fyrr í vetur í sýnum úr fé frá fimm bæjum austan vatna í Skagafirði. Bæirnir tilheyra svokölluðu Tröllaskagahólfi. Stjórnvöld fyrirskipuðu að öllu fé á þessum bæjum, ríflega þrjú þúsund fjár, yrði fargað þegar í stað og stóð héraðsdýralæknir fyrir því að það var gert.
Til baka
Leita í greinasafni
Prenta grein
