Dagbjartur Dagbjartsson rifjar upp á Boðnarmiði: „Hallgrímur Jónasson var oft fararstjóri hjá Ferðafélagi Íslands. Eitt sinn í náttstað kom upp koníaksflaska og var henni heilsað með þessum orðum:
Boðnarmjöður borinn er,
bráðvelkominn sértu,
jafnvel strax í gegnum gler
geislavirkur ertu.
Gleði eykur, glæðir von
goðafæðan drjúga.
Þetta sagði Salómon.
Sá var nú ekki að ljúga.“
Um þessa stöku Þorgeirs Magnússonar segir Ragnar Ingi Aðalsteinsson: „Endurvinnsluvísa. Þessi er dásamleg“:
Finni ég löngun, faðir minn,
að fá mér ögn í tána
hönd þín leiði mig út og inn
alla leið á krána.
Hjörtur Benediktsson yrkir við mynd af BBQ-kónginum til skýringar:
BBQ-kóngurinn kveikir eld
úr kolagrillinu rýkur
fullsaddir allir eru í kveld
íbúar Grindavíkur.
Norður í Mývatnssveit yrkir Friðrik Steingrímsson og spyr: „Er ég að missa af einhverju?“:
Latur gjarnan heima hangi
horfi varla á fréttirnar,
mér skilst að það sé gos í gangi,
getur einhver sagt mér hvar?
Hreinn Guðvarðarson svarar:
Inniveru oft þú kaust
(allir hugsa um sig)
Einhver veit það efalaust
en ekki að spyrja mig.
Indriði Aðalsteinsson hnykkir á:
Friðrik ekkert fann í blöðum
fróðleik engan sá á skjá.
Gos er núna á Geldingsstöðum.
Gengur býsna mikið á.
Anna Dóra Gunnarsdóttir segir að ef hún muni rétt hafi einhver verið að leggja til að samin verði klepraverk:
Þegar jörðin skekst og skelfur,
skutlar flákum hrauns um völl,
líst mér eins og eldsins elfur
ætli að hlaða kleprafjöll.
Guðrún Egilson orti eftir hrunið haustið 2008:
Þaðan geisar nú gjaldþrotahrina
og gapuxar benda á hina.
Mér ungri var kennt
og á það skal bent
að auður er valtastur vina.
Halldór Blöndal
halldorblondal@simnet.is