Helgi Bjarnason
helgi@mbl.is
Landsnet hefur hafið undirbúning að lagningu Holtavörðuheiðarlínu sem liggja á frá tengivirkinu á Klafastöðum við Grundartanga og að nýju tengivirki á Holtavörðuheiði. Ekki hefur verið ákveðið hvar nýja línan mun liggja en meðal annars er litið til þeirra háspennulína sem fyrir eru, Vatnshamralínu 1 og Hrútatungulínu 1 sem liggja úr Hvalfirði í Hrútafjörð.
Holtavörðuheiðarlína er liður í styrkingu byggðalínunnar á milli Suðvesturlands og Austurlands með uppbyggingu 220 kV háspennulínu. Framkvæmdir eru hafnar við Hólasandslínu 3 og Kröflulínu 3 sem liggja á milli Akureyrar og Fljótsdals og unnið að mati á umhverfisáhrifum Blöndulínu 3 sem tengir Akureyri við Blönduvirkjun. Eftir er þá umrædd Holtavörðuheiðarlína og önnur háspennulína frá Holtavörðuheiði að Blönduvirkjun.
Elín Sigríður Óladóttir, samráðsfulltrúi Landsnets, segir að ekki sé búið að ákveða staðsetningu nýs tengivirkis á Holtavörðuheiði eða línuleiðina. Það sé verkefni matsferlis vegna umhverfismats. Tekur hún þó fram að það sé stefna Landsnets að nýta þau mannvirki sem fyrir eru. Þess vegna sé núverandi línuleið einn af þeim kostum sem skoðaðir verða.