Frá því jörðin opnaðist á Reykjanesskaga kl. 20:45 föstudagskvöldið 19. mars hefur eldgosið laðað til sín fjölda fólks, sem skiptir orðið þúsundum eins og frá er greint framar í blaðinu. Skiptir þá litlu hvort fólk hefur farið að nóttu eða degi. Alltaf blasir við ný og ný sviðsmynd, eins vinsælt og það orð hefur verið undanfarnar vikur og mánuði í jarðhræringunum á Reykjanesskaga.
Fram undan eru fjölmörg tækifæri til að ná myndum af gosinu, sem vísindamenn telja að geti haldið áfram árum saman. Hið sérstaka við þetta eldgos er að það er nánast í túnfæti byggðar á suðvesturhorni landsins, þar sem stærstur hluti þjóðarinnar býr. Hafi fólk ekki séð eldgos áður er komið kjörið tækifæri til að standa í návígi við glóandi hraunið og taka af sér mynd í leiðinni.