Trillur Halldór telur ólíklegt að nokkur muni fara á grásleppu á Þórshöfn.
Trillur Halldór telur ólíklegt að nokkur muni fara á grásleppu á Þórshöfn. — Morgunblaðið/Líney
Karítas Ríkharðsdóttir karitas@mbl.is „Þetta verð sem er verið að bjóða er allt of lágt.

Karítas Ríkharðsdóttir

karitas@mbl.is

„Þetta verð sem er verið að bjóða er allt of lágt. Skelfilegt hvað það hefur lækkað frá því að það var 330 krónur á kílóið á vertíðinni 2019,“ segir Örn Pálsson, framkvæmdastjóri Landssambands smábátaeigenda, í samtali við 200 mílur um stöðu grásleppuveiða í ár.

Verðið fyrir kílóið af landaðri, óskorinni grásleppu var 225 krónur í fyrra en verðið sem býðst í ár er um 130 krónur. Þá eru veiðiheimildir fyrir hrognkelsum meiri í ár en þær hafa nokkurn tímann verið og hefur veiðidögum á hvert leyfi nú verið fjölgað úr 25 í 40.

Leyfilegt að skera hveljuna

Í ár var sú breyting gerð á reglugerð um nýtingu afla og aukaafurða að heimilt er að varpa hvelju af grásleppu fyrir borð. Þetta er gert til að koma til móts við stöðu á mörkuðum en ekki hefur gengið að selja hveljuna frá því að heimsfaraldur hófst.

„Staðan er þannig að ég er ekki farinn á grásleppu, og ég fer líklega ekki,“ segir Halldór Rúnar Stefánsson, formaður smábátafélagsins Fonts. Hann segir að ekki fari margir félagsmenn í Fonti á grásleppu í ár. „Sumir ætla að prófa þetta, öðrum veit ég af sem ætla ekki, bæði út af lélegu verði og vegna þess að Ora mun ekki kaupa grásleppuhrogn í ár. Líklega fer enginn frá Þórshöfn en einhverjir frá Bakkafirði.“ Smábátasjómenn á Þórshöfn geta ekki lagt upp hjá Ísfélagi Vestmannaeyja í ár þar sem félagið hefur verið í samstarfi við Ora. „Það er varla grundvöllur til að fara á grásleppu. Einhverjir renna hýru auga til byggðakvóta, þ.e. að leggja grásleppuna inn sem mótframlag, annað er ekki að græða á þessu,“ segir Halldór.

Eins og staðan var skömmu áður en blaðið fór í prentun voru 38 bátar búnir að landa grásleppu í ár og 84 búnir að virkja leyfi, þar af um helmingur á E-svæði sem nær yfir Norðausturland.