„Eftir á að hyggja hefði ég eflaust getað náð betri árangri ef ég hefði ekki þurft að búa við stöðugar fjárhagsáhyggjur,“ sagði Valdís Þóra Jónsdóttir, margfaldur Íslandsmeistari í golfi, í Dagmálum, frétta- og menningarlífsþætti Morgunblaðsins.
Valdís er frá Akranesi en hún byrjaði ung að æfa íþróttir og æfði lengi vel bæði fótbolta og golf. Hún sneri sér hins vegar alfarið að golfíþróttinni á unglingsárunum og varð Íslandsmeistari í höggleik í fyrsta sinn árið 2009, þá nítján ára. Valdís gerðist atvinnukylfingur árið 2013, varð fyrst Íslendinga til þess að spila á opna bandaríska meistaramótinu í New Jersey 2017 og þá náði hún bestum árangri sem Íslendingur hefur náð á Evrópumótaröðinni þegar hún endaði í þriðja sæti á Sanya-mótinu í Kína árið 2017.
„Ég var með styrktaraðila sem stóðu þétt við bakið á mér en maður hefði klárlega þurft meira eins og til dæmis listamannalaun eða eitthvað í þá áttina. Maður stóð oft yfir einhverju pútti með það á bak við eyrað að ef maður myndi ekki setja það niður gæti maður ekki borgað ákveðna reikninga um komandi mánaðamót og það tók á,“ sagði Valdís meðal annars.
Til baka
Leita í greinasafni
Prenta grein
