Víkingur og Valur eru á toppnum

Fótboltinn

Víðir Sigurðsson

vs@mbl.is

Víkingur og Valur eru á toppi Pepsi Max-deildar karla eftir viðburðaríka leiki gærkvöldsins, þó Reykjavíkurliðin tvö hafi reyndar látið sér nægja nauma 1:0 sigra gegn KA og Leikni.

Víkingar lögðu KA á Dalvíkurvelli, 1:0, þar sem Nikolaj Hansen skoraði sigurmarkið, og þar með tapaði KA sínum fyrsta leik síðan í tólftu umferðinni á síðasta tímabili. Akureyrarliðið tapaði því ekki í þrettán deildarleikjum í röð en fékk svo sannarlega tækifæri til að koma í veg fyrir tap á Dalvík í gærkvöld. KA fékk vítaspyrnu í uppbótartímanum en Hallgrímur Mar Steingrímsson hitti ekki mark Víkinga sem sluppu með skrekkinn og fóru með stigin þrjú suður.

Í heildina var sigur Víkinga sanngjarn. Þeir náðu að koma KA úr sínum leik og voru lengstum með yfirhöndina. KA-menn naga sig eflaust í handarbökin fyrir að hafa ekki gripið stigið sem var í boði í lokin,“ skrifaði Einar Sigtryggsson m.a. um leikinn á mbl.is.

Pedersen bjargaði Val

Valsmenn lentu í miklu basli með nýliða Leiknis á Hlíðarenda en danski markaskorarinn Patrick Pedersen kom þeim til bjargar með sigurmarki á 86. mínútu, 1:0, eftir glæsilegan undirbúning sænska bakvarðarins Johannes Vall .

Pedersen er þar með orðinn sextándi markahæsti leikmaður deildarinnar frá upphafi með 73 mörk. Hann fór uppfyrir tvær gamlar hetjur með þessu marki en Pétur Pétursson , Skagamaður og KR-ingur, og Keflvíkingurinn Steinar Jóhannsson gerðu báðir 72 mörk í deildinni.

Blikar hrukku í gang

Blikar hrukku heldur betur í gang eftir skellinn gegn Víkingum á dögunum og annan heimaleikinn í röð hrósuðu þeir 4:0 sigri. Nú gegn grönnum sínum úr Stjörnunni sem sitja fyrir vikið í botnsæti deildarinnar með aðeins tvö stig.

Þetta er versta byrjun Stjörnunnar í deildinni frá árinu 2000 en þá fékk Garðabæjarliðið eitt stig úr fyrstu sex leikjunum og féll að lokum um haustið en þó með minnsta mun, á markatölu.

* Kristinn Steindórsson kom inná sem varamaður snemma leiks þegar markaskorarinn Thomas Mikkelsen fór meiddur af velli. Kristinn kom Blikum á bragðið eftir hálftíma leik.

* Árni Vilhjálmsson skoraði sitt fyrsta mark fyrir Blika eftir endurkomuna þegar hann kom þeim í 3:0. Hann varð um leið fjórði leikmaðurinn í sögu félagsins til að skora 30 mörk í efstu deild karla.

* Daníel Laxdal , fyrirliði Stjörnunnar, spilaði sinn 300. deildaleik á ferlinum en hann er leikjahæstur Garðbæinga frá upphafi með 241 leik í úrvalsdeildinni og 59 í 1. deild.

„Eftir brösuga byrjun á Íslandsmótinu sýndu Blikar styrkleika sína í kvöld. Þeir börðust allir sem einn fyrir liðið, sérstaklega í seinni hálfleik, og var í raunar aldrei spurning hvort liðið myndi fara með sigur af hólmi eftir að annað markið kom,“ skrifaði Stefán Gunnar Sveinsson m.a. í grein um leikinn á mbl.is.

Baráttuglaðir Skagamenn

Skagamenn kræktu í fyrsta sigurinn með sigri á HK í Kórnum, 3:1, þrátt fyrir að hafa átt í vök að verjast stóran hluta leiksins. HK-ingar áttu sláar- og stangarskot í stöðunni 1:1 en baráttuglaðir Skagamenn komust yfir með marki Viktors Jónssonar og vörðust af miklum krafti eftir það.

* Ingi Þór Sigurðsson skoraði sitt fyrsta mark í efstu deild þegar hann innsiglaði sigur ÍA, 3:1, í uppbótartímanum. Ingi er bróðir Arnórs Sigurðssonar, landsliðsmanns hjá CSKA í Moskvu, og foreldrar þeirra, Margrét Ákadóttir og Sigurður Þór Sigursteinsson , léku með ÍA á sínum tíma og Margrét með íslenska landsliðinu.

„Það er áhyggjuefni fyrir HK að vera búið að leika fjóra heimaleiki í fyrstu fimm umferðunum án þess að vinna. Kórinn er ekki lengur það virki sem hann var áður og liðið er í basli. HK tókst ekki að vinna þrátt fyrir að vera miklu betri aðilinn. Hvenær kemur þá fyrsti sigurinn?“ skrifaði Jóhann Ingi Hafþórsson m.a. í grein um leikinn á mbl.is.

Enn fjögur gegn Keflavík

Fylkir vann sinn fyrsta leik og lagði Keflavík 4:2 en Keflvíkingar þurfa heldur betur að taka til í varnarleiknum hjá sér því þeir hafa nú fengið á sig fjögur mörk í þremur leikjum í röð.

* Orri Hrafn Kjartansson skoraði tvö marka Fylkis en þessi 19 ára gamli strákur hafði áður skorað eitt mark í deildinni, gegn KR undir lok síðasta tímabils.

*Ástralski framherjinn Joey Gibbs , sem skoraði 21 mark fyrir Keflavík í 1. deildinni í fyrra, komst loksins á blað í efstu deild. Hann skoraði seinna mark Keflvíkinga úr vítaspyrnu og minnkaði þá muninn í 4:2.