Fyrst og síðast stúdía í sorg

Negla Bandarísku sjónvarpsþættirnir Mare of Easttown hafa verið að fá glimrandi dóma beggja vegna Atlantsála. Þannig gefur gagnrýnandi breska blaðsins The Guardian, Lucy Mangan, þeim fullt hús, fimm stjörnur. Á yfirborðinu hverfist Mare of Easttown, sem er í sjö hlutum, um morð sem lögreglukonan Mare Sheehan rannsakar en að sögn Mangan er snert á fjölmörgu öðru, svo sem samskiptum kynslóðanna. Fyrst og síðast segir hún að þættirnir séu stúdía í sorg, auk þess sem þeir sýni okkur óvenjulega hlið á Bandaríkjunum, fjarri glys og glaumi Hollywood. Þá sé um stjörnuleik að ræða, ekki síst hjá Kate Winslet, sem fer með aðalhlutverkið.