Stefán Gunnar Sveinsson
sgs@mbl.is
Engin sönnunargögn eru fyrir því að óútskýrð loftför sem bandarískir herflugmenn hafa rekist á í síauknum mæli tengist lífi á öðrum hnöttum. Svo segir í nýrri skýrslu bandarískra stjórnvalda, sem kynnt verður fyrir Bandaríkjaþingi í þessum mánuði. Engu að síður viðurkenna höfundar skýrslunnar að í mörgum tilfellum sé ekki hægt að útskýra hin dularfullu loftför og fluggetu þeirra.
Bandaríska dagblaðið New York Times greindi í fyrrinótt frá niðurstöðum skýrslunnar og byggði frétt sína á frásögnum háttsettra embættismanna sem hafa fengið að kynna sér efni hennar. Skýrslan nær til rúmlega 120 atvika sem flugmenn á vegum herafla Bandaríkjanna, jafnt í landher, flota og flugher, hafa tilkynnt á undanförnum tveimur áratugum eða svo, en að auki voru könnuð nokkur tilfelli um óútskýrð loftför sem aðrar þjóðir hafa tilkynnt.
Hið eina sem er staðfest í skýrslunni er að í meirihluta þessara tilfella var ekki um að ræða loftför á vegum Bandaríkjahers eða háleynilega tækni á vegum leynistofnana Bandaríkjanna.
Þá segja skýrsluhöfundar að í mörgum tilfellum sé ekki hægt að útskýra þær dularfullu hreyfingar sem loftförin sýni af sér, en þau virðast geta hraðað sér á óvenjulegan hátt, skipt óvænt um stefnu og jafnvel farið á kaf neðansjávar.
Heimildarmenn New York Times sögðu því að vegna skorts á skýrum niðurstöðum væri heldur ekki hægt að útiloka að loftförin kæmu frá öðrum reikistjörnum.
Rússar og Kínverjar á ferðinni?
Háttsettur embættismaður innan njósnastofnana Bandaríkjanna sagði hins vegar að þeir vissu að tæknin væri ekki upprunnin á Vesturlöndum. Það væru því áhyggjur um að Rússar og Kínverjar væru að prófa sig áfram með flugför sem gætu ferðast á ofurhraða, það er fimmföldum hraða hljóðsins eða meira.Er talið líklegt að í einhverjum af þeim tilfellum sem fjallað er um í skýrslunni hafi verið um að ræða tilraunastarfsemi á vegum Rússa eða Kínverja, en Rússar hafa sett mikið púður í rannsóknir á ofurhraða, í þeirri von að með honum megi yfirvinna fyrirhuguð eldflaugavarnarkerfi Bandaríkjamanna. Þá hafa Kínverjar einnig þróað slík vopn, og jafnvel haft þau til sýnis á hersýningum sínum.
Hins vegar sögðu embættismennirnir einnig við New York Times, að ef um væri að ræða Rússa og Kínverja benti það til að þær þjóðir hefðu náð umtalsverðu forskoti á tækniþróun Bandaríkjahers.