Eftirlitsstofnun EFTA (ESA) hefur nú lokað rannsókn sinni á bindandi álitum skattayfirvalda í EFTA-ríkjunum þremur sem eiga aðild að Evrópska efnahagssvæðinu, Íslandi, Noregi og Liechtenstein, og hefur ekki fundið nein dæmi um að álitin séu ósamrýmanleg reglum EES-samningsins um ríkisaðstoð, sem samsvara reglum um ríkisaðstoð í ríkjum Evrópusambandsins.
Fram kemur á heimasíðu ESA, að stofnunin hóf rannsóknina að eigin frumkvæði og var hún gerð samhliða rannsókn framkvæmdastjórnar Evrópusambandsins á bindandi álitum skattyfirvalda í aðildarríkjum Evrópusambandsins.
Eftirlitsstofnun EFTA hefur eftirlit með framkvæmd og beitingu EES-samningsins af hálfu EFTA/EES-ríkjanna. Stofnunin hefur aðsetur í Brussel og situr Högni Kristjánsson í stjórn ESA fyrir hönd Íslands.
Til baka
Leita í greinasafni
Prenta grein
