Upphaf fasteignafélag hefur selt 24 af 58 íbúðum í síðari áfanga Hafnarbrautar 12 (F-G) en þær fóru í sölu fyrir rúmum þremur vikum.
Virðist því ekkert lát á spurn eftir nýjum íbúðum á Kársnesi.
Erlendur Fjeldsted, framkvæmdastjóri Upphafs, segir síðustu íbúðina hafa selst á nyrðri hluta Hafnarbrautar 12 (A-E) í síðustu viku. Þar er 71 íbúð og því samtals seldar 95 af 129 íbúðum á reitnum.
Íbúðirnar í F-G verða afhentar í september og október í haust.
Þá eru aðeins tvær íbúðir óseldar af 86 á Hafnarbraut 14 en tvær íbúðir í húsinu eru fráteknar.
Alls seldar um 180 íbúðir
Sala íbúða á Hafnarbraut 12 A-E hófst í febrúar en nokkrum vikum síðar á Hafnarbraut 14. Telst til tíðinda á íslenskum fasteignamarkaði að um 180 nýjar íbúðir skuli hafa selst svo hratt á aðliggandi reitum, en nokkrar þakíbúðanna kosta vel á annað hundrað milljónir.Upphaf fasteignafélag er í eigu GAMMA Novus. Þegar Upphaf hafði verið endurfjármagnað stóð til að verktaka- og þjónustufyrirtækið VHE myndi ljúka uppbyggingu á Hafnarbraut 12. Svo fór að aðilar sömdu um að fá annan verktaka að verkinu og tók Þingvangur yfir uppbygginguna.
Ásamt Hafnarbrautinni á Kársnesi var Upphaf að byggja íbúðir við Gerplustræti 7-11, við Vefarastræti 40-44 og við Bjarkarholt 7-9 og 21-29 í Mosfellsbæ og á Holtsvegi 2-6 í Urriðaholti í Garðabæ.
Flestir reitirnir uppseldir
Erlendur segir allar íbúðirnar á þessum reitum seldar, alls 248 íbúðir, að frátöldum 34 óseldum íbúðum á Hafnarbraut 12 F-G. Kórónuveirufaraldurinn setti strik í reikninginn hjá Upphafi, eins og hjá fleiri fasteignafélögum, en Erlendur segir verkefnin hafa gengið eins og í sögu.Varðandi framhaldið segir Erlendur að stjórn Upphafs muni taka stöðuna í haust, þegar afhendingu íbúða á Hafnarbraut lýkur, og ákveða næstu skref hjá félaginu.
„Við erum að skila af okkur öllum þeim fjármunum sem voru lagðir inn í félagið. Það er ljóst að félagið verður áfram til í nokkur ár en það ber meðal annars ábyrgð gagnvart kaupendum,“ segir Erlendur sem útilokar ekki fleiri verkefni.