Loksins sigur á ný hjá Selfossi

Fótboltinn

Víðir Sigurðsson

vs@mbl.is

Selfoss komst loks á sigurbraut á ný í gærkvöld með því að sigra Keflavík 1:0 í síðasta leiknum í tíundu umferð úrvalsdeildar kvenna í fótbolta.

Eftir sigra í fjórum fyrstu leikjunum í vor höfðu Selfosskonur aðeins fengið tvö stig í síðustu fimm leikjum og voru dottnar niður í fjórða sæti. Þær eru nú í þriðja sætinu á ný, fóru aftur uppfyrir Þrótt, en það verður talsverð brekka fyrir þær að reyna að ná aftur í skottið á toppliðum Vals og Breiðabliks. Keflavík heldur sér áfram fyrir ofan fallsæti á betri markatölu en Fylkir.

* Brenna Lovera lék á ný með Selfyssingum eftir tveggja leikja fjarveru vegna meiðsla. Hún skoraði sigurmarkið og hefur því gert sjö mörk í átta leikjum í deildinni í ár.

„Í seinni hálfleiknum voru Selfyssingar mun líklegri til þess að bæta við mörkum en Tiffany Sornpao átti góðan leik í marki Keflavíkur. Það reyndi nánast ekkert á Guðnýju Geirsdóttur í marki Selfoss, en síðustu tíu mínúturnar reyndu Keflvíkingar að kreista eitthvað út úr leiknum, án þess þó að fá teljandi færi,“ skrifaði Guðmundur Karl m.a. um leikinn á mbl.is.