Gunnlaugur Eiðsson fæddist 5. júní 1954. Hann lést 5. júlí 2021.
Gunnlaugur var jarðsettur í kyrrþey 27. júlí 2021.
Látinn er okkar kæri skólabróðir frá útskriftarárgangi Menntaskólans á Akureyri, 1974, Gunnlaugur Eiðsson.
Hans hefur þegar verið minnst hér, með óvenjuvel skrifuðum minningargreinum, og hef ég nú litlu að bæta við það, nema hvað við röbbuðum nokkrum sinnum saman á síðari áratugum á kaffihúsum hér í Reykjavík – og jafnvel hjá Sjálfstæðisflokknum!
Hann var, líkt og ég, iðinn við greinaskrif í skólablöðin í MA forðum og þáði svo seinna af mér eina ljóðabók mína!
Það kom fram í minningargrein að hann hefði skrifað mikið um sögu Hveragerðis, jafnvel gert efnileg olíumálverk. Kannski væri þá ráð að minnast hans frekar með því að gefa þetta nú út á bók, eða þá á netinu? Að vísu má þegar sjá greinaskrif eftir hann á Tímarit.is.
Ég vil minnast hans með því að vitna hér í ljóð mitt sem heitir: Bóndasonur og MA-stúdent, en það ljóð er innblásið af skáldsagnatilraunum mínum frá MA-námstímanum og endar á þessum orðum:
... og náði þá að þrýstast inn í MA,
sjálfan Menntaskólann á Akureyri,
þar sem menntaskólastúlkur
skvöldruðu
meira en fiskvinnslu- og bændakonur,
og undi mér svo sem dável hjá þeim,
á marrandi trégólfi þessa eðalhúss,
meðan skuggar garðtrjánna voru
langir,
og steig líka í gráðið á böllunum!
Tryggvi V. Líndal.