Airwaves frestað annað árið í röð

Höskuldur Daði Magnússon

hdm@mbl.is

„Erlendu listamennirnir sem við höfum þurft að afbóka vegna þessarar ákvörðunar furða sig allir á þessu og skilja ekki þessar takmarkanir hér. Þeir eru flestir farnir að ferðast um og halda tónleika. Það virðast allir trúa því að hægt sé að halda hátíð sem Airwaves með öruggum hætti, nema yfirvöld á Íslandi,“ segir Ísleifur B. Þórhallsson, tónleikahaldari hjá Senu live.

Tilkynnt var í gær að tónlistarhátíðinni Iceland Airwaves, sem halda átti í byrjun nóvember, hefði verið frestað um eitt ár. Þetta er annað árið í röð sem skipuleggjendur þurfa að fresta hátíðinni vegna samkomutakmarkana af völdum kórónuveirunnar. Ísleifur segir í samtali við Morgunblaðið að í fyrra hafi verið fullur skilningur á því að ómögulegt hafi verið að halda hátíðina. Annað sé uppi á teningnum nú.

„Það er allt að opnast í löndunum í kringum okkur, Bandaríkin eru opin, England er opið og það á að létta öllum hömlum í Danmörku eftir viku. Þar gefa stjórnvöld það út að samfélaginu standi ekki lengur ógn af Covid. Hver er munurinn á okkur og öllum þessum löndum? Við erum með hæsta bólusetningarhlutfall í heimi, af hverju er ekki hægt að treysta heilsuhraustu fólki til að fara á stærri tónlistarviðburði? Við erum ekki að reyna selja tónleikamiða til viðkvæmra hópa, eða fólks með undirliggjandi sjúkdóma. Það er ekkert mál að krefja fólk um bólusetningarskírteini. Af hverju þarf meiri hömlur ef fólk getur sýnt fram á bólusetningu og framvísað skyndiprófi, þegar sýnt er að þetta dugar erlendis og vel það?“ segir Ísleifur.

Nýverið ákváðu yfirvöld að leyfa 500 manna samkomur með ákveðnum skilyrðum. Ísleifur segir að sú ákvörðun hafi vissulega verið skref í rétta átt. Hún gagnist leikhúsunum og Hörpu, nú sé unnt að halda sitjandi tónleika ef gestir bera grímur þar til þeir setjast í sæti, þeir mega ekki snúa andspænis öðrum og svo framvegis. Gestir þurfa einnig að fara í skyndipróf en allt er enn óljóst um framkvæmd þeirra og aðgengi tónleikagesta að þeim. Áfram gilda hins vegar 200 manna takmörk á aðra viðburði.

„Fólk má fljúga út til Danmerkur eða Bretlands um helgar og fara á 60 þúsund manna fótboltaleik eða 100 þúsund manna tónlistarhátíð en það er ekki hægt að halda Airwaves í miðborg Reykjavíkur. Finnst fólki mikið vit í þeirri stöðu?“ spyr tónleikahaldarinn.

„Ég held að ráðherrar þurfi nú að svara til um grundvallaratriði málsins. Af hverju eru hömlur hér? Hver er tilgangurinn og hvað á þetta að vara lengi? Átta þau sig á fórnarkostnaðinum? Hvað er planið? Hér virðist ekki vera nein langtímastefna. Það eru gefnar út reglugerðir með nokkura daga fyrirvara sem gilda í þrjár vikur og því er ekki hægt að gera nein plön. Eftir hvaða upplýsingum er verið að bíða? Upplifunin núna er að vandamálið sé ekki lengur vírusinn heldur yfirvöld og það er vond tilfinning.“

Iceland Airwaves var fyrst haldin árið 1998 og hefur frá upphafi verið einskonar uppskeruhátíð tónlistarbransans hér á landi. Tónlistarfólk leggur mikið upp úr framkomu sinni á hátíðinni enda getur hún opnað tækifæri úti í heimi. Ísleifur viðurkennir fúslega að það sé áhyggjuefni fyrir tónlistarheiminn að fresta þurfi hátíðinni. Sena tók við rekstri Airwaves árið 2018 og náði því að halda hana tvisvar áður en kórónuveiran setti strik í reikninginn.

„Það er ekki sjálfgefið að Airwaves lifi af í núverandi mynd. Við töldum okkur vera búin að ná tökum á rekstri hátíðarinnar og það er ótrúlega niðurdrepandi að öll þessi vinna sé að fara í súginn.“