Frakkinn Arsène Wenger, þróunarstjóri alþjóðaknattspyrnusambandsins (FIFA), leggur til að heimsmeistaramótið í knattspyrnu verði haldið á tveggja ára fresti. Þetta kom fram í viðtali við hann í franska blaðinu L'Equipe á föstudaginn. Hann stingur einnig upp á því að undankeppni vegna HM og EM fari fram í einum og sama glugganum að hausti.
Meginreglan yrði sú að undankeppnin færi fram í beit að hausti, til dæmis í október, og síðan yrði stórmót að sumri, að loknum tímabilum félagsliðanna. Þess á milli yrðu leikmennirnir um kyrrt hjá félagsliðum sínum sem myndi kalla á mun færri ferðalög, auk þess sem minna rof kæmi í deildarkeppnir hinna ýmsu landa. Wenger sér fyrir sér að leikjum í undankeppnum yrði fækkað og að lögbundin hvíld, 25 dagar hið minnsta, tæki við eftir lokakeppnina að sumri. Hann sér fyrir sér að þetta nýja fyrirkomulag taki gildi árið 2028.
Til baka
Leita í greinasafni
Prenta grein
