Í fyrramálið birtist fyrsta viðtalið af níu í þættinum Dagmálum sem tekin eru við forystumenn þeirra stjórnmálaflokka sem tilkynnt hafa framboðslista í öllum kjördæmum.
Katrín Jakobsdóttir, formaður Vinstri hreyfingarinnar – græns framboðs og forsætisráðherra, er fyrsti viðmælandi þeirra Andrésar Magnússonar og Stefáns Einars Stefánssonar en þeir munu í sameiningu ræða við leiðtogana hvern í sínu lagi. Sama dag og viðtölin birtast á mbl.is er birtur útdráttur úr þeim á síðum Morgunblaðsins.
Dagmál eru streymisþáttur á mbl.is sem opinn hefur verið áskrifendum Morgunblaðsins frá því þeir hófu göngu sína í mars síðastliðnum. Þættirnir, sem hver rekur annan fram að kosningum, verða hins vegar opnir öllum notendum mbl.is og er það gert í kynningarskyni á þáttagerðinni undir merkjum Dagmála. Hefur hún mælst afar vel fyrir meðal áskrifenda og í þessari viku lítur 150. þátturinn dagsins ljós.
Farið í saumana á helstu málum
Í viðtölunum við forystufólk flokkanna er áhersla lögð á að fara ofan í saumana á stefnumálum sem kynnt hafa verið kjósendum og einnig gerð tilraun til þess að varpa skýru ljósi á afstöðu þeirra til stórra álitaefna sem uppi eru og móta munu stjórnmálin á komandi árum. Má þar nefna heilbrigðismál, umhverfismál og ekki síst hvernig flokkarnir sjá fyrir sér að fjármagna rekstur ríkissjóðs sem enn er rekinn með talsverðum halla.Í kosningavikunni verður forystufólkið einnig boðað í kappræður sín á milli og munu þær umræður einnig eiga sér stað undir merkjum Dagmála. Sá háttur verður hafður á að hópnum verður skipt í tvennt og verða því kappræðurnar birtar í tvennu lagi. Er það gert til þess að gefa hverjum og einum flokki svigrúm til þess að koma skilmerkilega á framfæri stefnumálum sínum og áherslum en einnig gagnrýni á stefnumið þeirra sem etja við þá kappi.