Um þriðjungur hreindýra sem leyft er að veiða á þessu ári, um 400 dýr af 1.220, var óveiddur á sunnudaginn var. Þá voru aðeins tíu dagar eftir af veiðitíma tarfa og 15 dagar af veiðitíma kúa.
„Það er dálítið mikið óveitt,“ segir Jóhann G. Gunnarsson, sérfræðingur Umhverfisstofnunar á Egilsstöðum. Hann segir að veiðin hafi tekið dálítinn kipp í síðustu viku. Einmuna blíða hefur verið allt þetta veiðitímabil. Tarfaveiðar hófust 15. júlí og veiði á kúm 1. ágúst. Veidd dýr hafa verið væn og vel haldin.
Þrátt fyrir gott veður hafa færri veiðimenn komið á stundum á veiðar en á sama tímabili í fyrra. Þá er áberandi hvað veiðarnar hafa verið mikið um helgar en ekki á virkum dögum. Jóhann kveðst ekki kunna fullnægjandi skýringar á því hvers vegna ekki hefur meira veiðst.
„Ein gæti verið að það voru fá dýr á svæði 2. Þau sem sáust voru flest inni í griðlandinu við Snæfell. Þar var dálítið stór hópur nær allan ágústmánuð. Svo vantar dýr inn á svæði sem sennilega eru lengst suður frá á illveiðanlegum svæðum. Það getur stafað af því að það hafa verið langvarandi suðlægar áttir og dýrin leita upp í vindinn,“ segir Jóhann. Þess má geta að kvótinn á svæði 2 er 275 dýr á þessu ári. Jóhann segir að sér kæmi ekki á óvart ef einhver leyfi brynnu inni. gudni@mbl.is