Dregið verður í dag til 2. umferðar í Evrópudeild karla í handknattleik og verða Íslandsmeistarar Vals í skálinni.
Valur er í neðri styrkleikaflokki og mun fá andstæðing úr efri styrkleikaflokki. Þar er að finna nokkur þekkt handboltalið og leika Íslendingar með þremur þeirra.
Valur getur til að mynda mætt Rhein-Neckar Löwen en þar leikur uppalinn Valsari, Ýmir Örn Gíslason, sem er lykilmaður í vörn íslenska landsliðsins.
Einnig eru þýsku bikarmeistararnir í Lemgo á meðal þeirra liða sem Valur getur mætt en helsti markaskorari liðsins er Bjarki Már Elísson.
Franska liðið Aix verður einnig í skálinni en liðið kom skemmtilega á óvart í Frakklandi síðasta vetur. Með Aix leikur örvhenta skyttan Kristján Örn Kristjánsson.
Valur getur einnig mætt eftirtöldum liðum:
RK Nexe frá Króatíu
Mors-Thy frá Danmörku
Ademar Leon frá Spáni
Granollers frá Spáni
Nimes frá Frakklandi
Füchse Berlín frá Þýskalandi
Wisla Plock frá Póllandi
Sporting frá Portúgal
Malmö frá Svíþjóð.