Barna- og unglingasýningar Þjóðleikhússins munu verða nýttar í kennsluefni sem Menntavísindasvið Háskóla Íslands mun útbúa í samstarfi við fræðsludeild leikhússins, að því er fram kemur í tilkynningu frá leikhúsinu.
Hafa þau tekið höndum saman um gerð kennsluefnis fyrir börn og unglinga sem mun byggjast á barna- og unglingasýningum Þjóðleikhússins sem eru í sýningu hverju sinni og nýtast vel til að auka læsi ungmenna á leiklist og bæta aðgengi þeirra að leikhúsi. Kennsluefnið er hugsað jöfnum höndum fyrir almenna kennara og leiklistarkennara, eins og segir í tilkynningunni.
Björn Ingi Hilmarsson frá fræðsludeild Þjóðleikhússins og Jóna Guðrún Jónsdóttir og dr. Rannveig Björk Þorkelsdóttir frá leiklistarkjörsviði Menntavísindasviðs Háskóla Íslands, skrifuðu undir samstarfssamning um verkefnið í síðustu viku.
Þær sýningar sem um ræðir þetta leikárið eru m.a. Vloggið eftir Matthías Tryggva Haraldsson, Kafbátur eftir Gunnar Eiríksson og Ég get eftir Peter Engkvist.
Til baka
Leita í greinasafni
Prenta grein
