Á Boðnarmiði skrifar Anton Helgi Jónsson við mynd af sér og Jónasi Hallgrímssyni:
„Ég veit ekki hvað er hægt að segja um úrslit kosninganna en við Jónas gerðum það gott hér á Akureyri í gær. Dagskráin „Jónas á tímum loftslagsbreytinga“ fór ákaflega vel í fólk og nú er ákveðið að næst verður hún flutt á Norðurbakkanum í Hafnarfirði 16. nóvember. Þegar ég rölti út í morgun fannst mér eins og Jónas stæði heilshugar með mér í þeirri ákvörðun en ég gleymdi að spyrja hvernig honum litist á úrslit kosninganna. Einhver fugl, samt ekki þröstur, hvíslaði hins vegar að mér þessari limru“:
Þótt hvatt sé til kosningadáða
og kíkt sé á lífsskoðun tjáða
þarf fólk samt að skilja
þann forsjónarvilja
að framsóknarmennirnir ráða.
Magnús Halldórsson skrifaði árla á sunnudagsmorgun: „Samkvæmt könnun MMR er það stuðningsfólk Flokks fólksins sem stundar mest að „snúsa“, þegar horft er til stjórnmálaskoðana Íslendinga“:
Mundi sár og merin reið,
nú mega snúsa.
Frá þeim burtu fylgið skreið,
til föðurhúsa
Ármann Þorgrímsson við morgunverðarborðið daginn eftir kosningar:
Hér ég sit með hönd við kinn
hugsa um framtíð dapur
er nú fluga orðinn minn
eini félagsskapur.
Stefán Már Halldórsson orti á sunnudag:
Alþýðubarátta' er ekkert grín,
og óvíst hvort bættur sé skaðinn.
Byltingin étur börnin sín
og B-listinn kominn í staðinn!
Skúli Pálsson yrkir og kallar „Gosbrunnur“:
Braghenda er brunni lík hvar buna flýgur,
lóðrétt upp í loftið stígur,
lokahending niður hnígur.
„Þjóðarsálin“ er limra eftir Helga Ingólfsson:
Hennar telst heiðarleg fæðing,
til höfðingja kaus hún sér fræðing.
Hún átti sér glóð.
Svo greip mína þjóð
fádæma fávitavæðing.
Enn yrkir Helgi:
Bjartur og breiðleitur hnokki
brosir nú hreykinn á stokki.
Í fjósið hjá þeim
fylgið kom heim,
baulur úr Framsóknarflokki.
Halldór Blöndal
halldorblondal@simnet.is