Abdul Qadeer Khan lést í gærmorgun, 85 ára að aldri, af völdum Covid-19. Hann er þekktur sem „faðir pakistönsku kjarnorkusprengjunnar“. Khan er einnig þekktur undir nafninu AQ Khan og hefur lengi verið sagður einn hættulegasti maður heims, samkvæmt umfjöllun BBC, vegna þátttöku sinnar í útbreiðslu kjarnorkuvopna.
AQ Khan var hylltur sem þjóðhetja í Pakistan en hann gerði ríkið að fyrsta íslamska ríkinu til þess að eignast kjarnorkuvopn.
Árið 2004 var AQ Khan fangelsaður þegar í ljós kom að hann hafði selt Norður-Kóreu, Íran og Líbíu kjarnorkutækni. Í sjónvarpsávarpi baðst AQ Khan afsökunar og harmaði svik sín. Pervez Musharraf náðaði AQ Khan en hann var í stofufangelsi til ársins 2009.
Leyniþjónustur vestrænna ríkja, svo sem CIA og MI6, hafa haft það sem forgangsverkefni síðustu ár að ná tökum á víðfeðmu samskiptaneti AQ Khans.
Síðustu ár sín bjó AQ Khan við mikla öryggisgæslu en hann lést á sjúkrahúsi í Islamabad eftir að hafa veikst af Covid-19.
Forsætisráðherra Pakistans, Imran Khan, minntist AQ Khan á Twitter og sagðist harma dauða hans.
AQ Khan er talinn hafa borið einna mesta ábyrgð á útbreiðslu kjarnorkuvopna en eins og hefur komið fram áður hjálpaði hann fjölmörgum löndum að öðlast færni til þess að hefja framleiðslu kjarnorkuvopna.
Í viðtali við AFP árið 2008 sagðist Khan hafa bjargað landinu tvisvar; í fyrra skiptið þegar hann gerði Pakistan að ríki sem byggi yfir kjarnorkuvopnum og í annað skipti þegar hann játaði að hafa lekið upplýsingum um byggingu kjarnorkuvopna til annarra landa og þar með tekið sökina á sig.
Khan hefur einnig sagt að Pakistan hafi aldrei viljað framleiða kjarnorkusprengjur heldur hafi landið verið neytt til þess að hefja framleiðslu vegna hættu sem steðjaði að frá öðrum ríkjum.
Til baka
Leita í greinasafni
Prenta grein