Heiðbjört Erla Árnadóttir

Elsku mamma, við getum ekki lýst því hversu sárt er að þú sért farin. Síðustu dagar hafa verið okkur systkinunum óraunverulegir. Við heyrðumst ekki alls fyrir löngu, þá var gott í þér hljóðið. Það er svo erfitt að vita til þess að heyra ekki röddina þína og fá faðmlag aftur. Söknuðurinn er ólýsanlegur.

Þegar þetta er skrifað og við hugsum til baka þá streyma minningarnar fram, til dæmis af einni af mörgum norðurferðum sem við fórum saman á æskuslóðir þínar í Skagafirði. Þú sýndir okkur hvar þú bjóst með foreldrum þínum og mörgum systkinum við þröngan húsakost og sagðir okkur frá þegar þið fóruð í sundlaugina í Varmahlíð. Þú varst mjög stoltur Skagfirðingur og af öllu sem þaðan kom, ekki má nú gleyma sérstöku skagfirsku orðabókinni þinni.

Þú varst ávallt stolt af barnabörnunum þínum og skemmtir þér konunglega á danskri grund í fermingunni hennar Freyju á þessu ári. Þú hlakkaðir líka til fermingar Ágústu Erlu á næsta ári og varst búin að tryggja veislusal í blokkinni sem þú bjóst í, á Þórðarsveigi 5, fyrir veisluna. Einnig hafðir þú skipulagt að fara í ferminguna hans Daníels í Danmörku sama ár.

Þú varst alltaf boðin og búin að hjálpa með næstum hvað sem var, hvort sem var um að ræða fyrir okkur í fjölskyldunni eða vinafólk. Oft á tíðum gekkstu nærri þér í góðmennsku þinni. Þú máttir ekkert aumt sjá, þá varst þú komin til aðstoðar og gleymdir stundum sjálfri þér. En seiglan í þér var ótrúleg og húmorinn aldrei langt undan.

Elskuleg móðir okkar, nú er komið að kveðjustund að sinni. Við þökkum þér innilega fyrir allar stundirnar sem við áttum saman. Okkar lokakveðja til þín er þetta fallega og lýsandi ljóð, megir þú hvíla í friði.

Þín börn,

Systir okkar, Heiðbjört Erla, er fallin frá á sextugasta og sjöunda aldursári og fylgir þar Þuríði systur sinni sem lést árið 2014. Hún var sjötta í röð níu barna foreldra okkar, heiðurshjónanna Jórunnar Sigurbjörnsdóttur og Árna Kristjánssonar, sem bæði eru látin. Þau bjuggu í Skagafirði fram til 1960, og eru flest barnanna fædd þar, en fluttu þá til Akureyrar.

Heiðbjört gekk í Oddeyrarskóla og lauk þar burtfararprófi. Hún fór snemma út á vinnumarkaðinn og vann lengi í fiskvinnslu, bæði á Akureyri og í Vestmannaeyjum. Henni varð þriggja barna auðið. Elstur er Magnús, fæddur 14.10. 1974, sem hún eignaðist með Magnúsi Jónssyni frá Ólafsfirði. Sambýlismaður Heiðbjartar var síðan Gísli Bogi Jóhannesson frá Grímsgerði í Fnjóskadal og eignuðust þau tvö börn. Þau slitu samvistir. Eldra barnið er Sigrún, fædd 12.12. 1977. Hún á dótturina Ásgerði Erlu. Sambýlismaður hennar er Flosi Jónsson. Yngra barnið, Jóhannes Helgi, fæddist 2.2. 1981.

Ævi Heiðbjartar var ekki alltaf rósum stráð. Hún flutti til Reykjavíkur eftir samvistarslit og átti hún þar góða daga og slæma. Oft varð henni hugsað heim til Akureyrar og hringdi þá gjarnan til að fá fréttir af fólkinu sínu og fylgdist vel með systkinum sínum og þeirra lífi. Hún vildi alltaf öllum hjálpa þótt hún af veikum mætti ætti oft erfitt með það.

Í sumar sem leið heimsótti hún Magnús son sinn sem býr í Danmörku og fjölskyldu hans; sambýliskonuna Tínu og börnin Freyju og Daníel. Hún var viðstödd fermingu sonardóttur sinnar, Freyju, og var hún óumræðilega ánægð með ferðina.

Heiðbjört átti við vanheilsu að stríða síðustu mánuðina og kannski má segja að hún hafi uppfyllt sínar hinstu óskir með ferð sinni til Danmerkur.

Magnús, Sigrún, Jóhannes Helgi og fjölskyldur, okkar innilegustu samúðarkveðjur til ykkar allra.

Elsku systir hvíl í friði.