Kristín Þorsteinsdóttir fæddist í Reykjavík 18. júlí 1943. Hún lést á krabbameinsdeild Landspítalans við Hringbraut 7. október 2021. Foreldrar hennar voru Þorsteinn Gíslason málarameistari, f. 1. okt. 1913, d. 25. des. 2003, og Elín Sigurðardóttir húsfreyja, f. 19. júní 1918, d. 14. febrúar 2007. Systur Kristínar eru Steinunn (samfeðra), f. 23. sept. 1934, d. 19. nóv. 2014, Sigríður, f. 26. feb. 1947, Erla, f. 29. sept. 1948, Guðrún (samfeðra), f. 28. maí. 1949.
Kristín giftist Þórði R. Jónssyni, f. 3. sept. 1940, þann 23. nóv. 1963. Foreldrar hans voru Jón Thordarson, f. 1893, d. 1967, og Anna Þórðardóttir, f. 1909, d. 1996. Börn þeirra eru: 1) Anna, f. 1960, gift Kára Grétarssyni, f. 1960, og eiga þau tvo syni, a) Þórð, f. 1987, sambýliskona hans er Elsa Kristín, börn þeirra eru: Laufey Líf, Anna, Tinna, Sunna og Kári. b) Grétar, f. 1989. 2) Elín Þórðardóttir, f. 1967. 3) Jón, f. 1971, kvæntur Lindu Hilmarsdóttur, f. 1966, og eiga þau tvær dætur, a) Nótt, f. 1997, sambýlismaður hennar er Sigvaldi. b) Embla, f. 2000, sambýlismaður hennar er Janus Daði.
Kristín ólst upp í Vesturbænum gekk í Melaskóla, Gagnfræðaskólann við Hringbraut og síðan í Gagnfræðaskóla verknáms. Seinna meir fór hún í Einkaritaraskólann, verslunar- og skrifstofuþjálfun hjá Námsflokkum Reykjavíkur, öldungadeildina í Hamrahlíð og MFA-skólann.
Kristín vann ýmis störf í verslun, skrifstofu og banka. Vann á skrifstofu Osta- og smjörsölunnar, hjá Almennum tryggingum, Samvinnuferðum-Landsýn, Heildverslun Þorsteins Gíslasonar/versluninni Málarameistaranum, Fjölbrautaskólanum í Garðabæ og endaði sinn starfsferill hjá Isavia 69 ára. Hún var virkur meðlimur í Oddfellow-stúku nr. 7 Þorgerði og Kvenfélagi Garðabæjar.
Kristín og Þórður hófu sinn búskap í Reykjavík en fluttu í Garðabæinn 1975 og bjó hún þar er hún lést.
Útför Kristínar fer fram frá Vídalínskirkju í dag, 15. október 2021, og hefst athöfnin kl. 13.
Elsku mamma mín. Ég trúi því ekki að þú sért farin frá okkur. Ég hélt að þú myndir lifa okkur öll, hélt að þú værir ódauðleg. En svona er lífið. Einhvern tímann förum við öll. Eitt veit ég fyrir víst og það er að afi og amma og vinkonur þínar munu taka á móti þér með útbreiddan faðminn.
Ég á svo margar yndislegar minningar um þig og pabba. Þvílík forréttindi að hafa fengið að vera með ykkur og fjölskyldunni í öllum skíðaferðalögunum og sólarlandaferðunum okkar um alla heima og geima. Svo ekki sé minnst á allar útilegurnar sem við fórum saman í hérlendis. Það var svo ótrúlega gaman. Þið sýnduð okkur hvað Ísland er fallegt.
Elsku mamma mín, þú átt svo stóran part í hjarta mér og þar munt þú alltaf vera. Ég sakna þín mikið.
Með þessu ljóði kveð ég þig:
Sem ungu barni þú ruggaðir mér
í svefninn, með söng á vörum þér.
Svaf ég þá vel og svaf ég fast
því ég vissi, alla þína ást mér gafst.
Er erfitt ég átti þú studdir mig
kenndir mér hvernig á að virða sjálfan sig.
Vera góð og heiðarleg
muna það, virða hvar sem ég dvel.
Ólst mig upp með von í hjarta
mér til handa um framtíð bjarta.
Hamingjusöm ég á að vera
elskuleg móðir sem allt vill gera.
Með þessum orðum vil ég þakka þér
alla þá ást og umhyggju sem gafst þú mér.
Ég elska þig mamma og mun ávallt gera
vil ég þú vitir það hvar sem ég mun vera.
(Höf. ók.)
Þín dóttir,
Elín Þórðardóttir.
Þegar hún vildi ná sambandi við okkur byrjaði einn síminn að hringja og svo koll af kolli í alla síma heimilisins þar til einhver svaraði. Þegar við hringdum til baka þá var nokkuð víst að það væri á tali enda vinamörg og vinsæl. Það var aldrei dauð stund hjá Kiddý, hún lifði lífinu lifandi og nýtti nánast hverja mínútu. Gat spjallað við allt og alla alls staðar.
Hún var og vildi alltaf vera til staðar fyrir okkur. Ef eitthvað kom upp á erfði hún það aldrei við nokkurn mann og var búin að hringja eða koma við eins og ekkert hefði gerst skömmu síðar. Hún var náin dætrum okkar og áttu þær fallegt samband við ömmu sína og afa. Kiddý hugsaði vel um sig og var dugleg að hreyfa sig, mætti reglulega í leikfimi í Hress og fór út að ganga þegar skemmtilegur félagsskapur bauðst. Hún spilaði golf reglulega og kom það ekki á óvart þegar birtust af henni myndir með verðlaun á samfélagsmiðlum eftir golfmót. Þau hjónin voru mikið skíðafólk og fengu öll börnin þeirra að læra á skíði í Kerlingarfjöllum. Flestar helgar var farið upp í fjöllin að skíða eða flogið til Austurríkis og notið saman þar. Fjörugar útilegur með Ítalíupakkinu og fleirum voru öllum eftirminnilegar. Það kom því eins og þruma úr heiðskíru lofti að Kiddý gæti fallið frá svona skyndilega. Maður var sannfærður um að hún fengi fleiri ár með okkur.
Við áttum sama afmælisdaginn tengdamæðgurnar. Vorum við báðar miklar afmælisstelpur og höldum iðulega báðar upp á daginn okkar. Við þurftum stundum að gera samkomulag um hver héldi boðið og ef það voru stórafmæli þá var allt gefið eftir og sannarlega samfagnað. Það verður með söknuði sem ég held upp á daginn okkar í framtíðinni en ég lofa að við hugsum hlýtt til hennar og skálum henni til heiðurs. Það var huggun harmi gegn að við fengum að kveðja hana þegar ljóst var hvert stefndi og gott að finna ástina og væntumþykjuna frá henni síðustu dagana. Farðu í friði og það er öruggt mál að minning þín lifir.
Þinn sonur
Jón (Nonni) og tengdadóttir Linda.
Við elskum þig og hvíldu í friði elsku Kiddý, amma og langamma.
Ég sendi þér kæra kveðju,
nú komin er lífsins nótt,
þig umvefji blessun og bænir,
ég bið að þú sofir rótt.
Þó svíði sorg mitt hjarta
þá sælt er að vita af því,
þú laus ert úr veikinda viðjum,
þín veröld er björt á ný.
Ég þakka þau ár sem ég átti,
þá auðnu að hafa þig hér,
og það er svo margs að minnast,
svo margt sem um hug minn fer,
þó þú sért horfinn úr heimi,
ég hitti þig ekki um hríð,
þín minning er ljós sem lifir
og lýsir um ókomna tíð.
(Þórunn Sigurðardóttir)
Þórður, Elsa Kristín
og börn.
Hótel Kiddý var opið allan sólarhringinn og það var alltaf til svefnsófi ef við skyldum vilja gista. Þegar við vorum hjá þér þurftum við varla að lyfta fingri og oftar en ekki bauðstu okkur heitan bakstur á bakið og fótanudd á þreytta íþróttafætur. Það kom líka fyrir að við mættum með heilar þvottakörfur yfir til þín og þú varst ekki lengi að þvo og strauja allt fyrir okkur og gerðir það með glöðu geði. Á leiðinni út stóðuð þið afi í dyragættinni og fylgdust með okkur alveg þangað til lyftan lokaðist, þú vildir nefnilega ekki missa af neinu. Þegar það var mikið að gera hjá okkur og við komumst ekki í heimsókn þá komst þú til okkar upp í vinnu eða heim, bara rétt til að sjá okkur og kannski lauma til okkar smá pening.
Elsku amma, takk fyrir allt sem þú hefur gert fyrir okkur má þar nefna píanókennslu, golfkennslu, utanlandsferðir, stuðning við námið eða ömmudekrið sem aldrei endaði. Við vildum óska þess að við gætum knúsað þig einu sinni enn, það var svo gott að knúsa þig elsku amma, maður fann fyrir svo mikilli væntumþykju frá þér. Þú varst alltaf á ferð og flugi og lifðir svo fallegu og skemmtilegu lífi, þannig viljum við vera.
Hvíldu í friði elsku amma, við elskum þig og vitum að þú heldur áfram að fylgjast með og styðja okkur í gegn um lífið.
Þín barnabörn,
Nótt og Embla.
Kiddý eignaðist sinn lífsförunaut snemma á lífsleiðinni, en sumarið 1959 lágu leiðir þeirra Bugga saman á göngu á Snæfellsjökli og hafa þau gengið saman lífsveginn í 63 ár. Þau eiga þrjú börn, Önnu, Ellu og Jón, barnabörnin eru fjögur og barnabarnabörnin fjögur einnig. Það var alltaf mikill gestagangur hjá Kiddý og Bugga á þeirra fallega heimili, dásamleg og ógleymanleg jóla- og áramótaboð þar sem Kiddý var hrókur alls fagnaðar, svo kát, brosmild og hress.
Kiddý stundaði alls kyns hreyfingu og útivist allt sitt líf, var í körfu þegar hún var yngri, stundaði skíði og göngur en síðustu árin átti golfið hug hennar allan og spilaðu þau Buggi golf um allan heim. Þau ferðuðust mikið bæði innanlands og utan, full áhuga á náttúru landa og menningu þjóða. Nú er elsku Kiddý komin í þann heim sem enginn veit hvernig er en ég trúi að vel sé tekið á móti henni þar sem hún kemur, brosmild og falleg.
Elsku Kiddý, þín verður sárt saknað af mér og allri stórfjölskyldunni, elsku systir, takk fyrir góða samfylgd í gegnum lífið, hvíldu í friði, Faðirinn mun þig geyma.
Erla og Ágúst.
Far þú í friði,
friður Guðs þig blessi,
hafðu þökk fyrir allt og allt.
Gekkst þú með Guði,
Guð þér nú fylgi,
hans dýrðarhnoss þú hljóta skalt.
(Valdimar Briem)
Þín,
Sigríður (Sigga) systir.
Við Kiddý kynntumst þegar hún flutti sex ára gömul á Grenimelinn í Vesturbæ, þar sem ég bjó, en þá var ég sjö ára. Síðan þá höfum við verið mjög nánar vinkonur. Kiddý hefur því verið stór hluti af tilveru minni nánast allt mitt líf, og mun ég sakna hennar mjög sárt.
Kiddý var mikil félagsvera, góð húsmóðir, frábær kokkur og gestgjafi og hélt einstaklega flottar veislur á sínu fallega heimili. Hún var mjög samviskusöm með allt sem hún tók sér fyrir hendur, og sinnti vel því sem henni var treyst fyrir.
Hún var skemmtileg og gat verið bráðfyndin og voru ófá hlátursköstin sem við tókum, ekki síst þegar hún gerði grín að sjálfri sér, en Kiddý hafði mjög skemmtilega frásagnargáfu sem gat fengið okkur vinkonurnar, úr öllum hópum, til að skella upp úr. En fyrst og fremst var Kiddý einstök vinkona mín sem í gegnum árin hefur deilt með mér hlátri og gráti, gleði og sorg.
Kiddý kynntist Bugga sínum (Þórði) mjög ung og þau hjónin voru miklir vinir okkar Jóa. Þegar við vorum yngri fórum við saman í útilegur og ferðalög um landið. Þá vorum við svo lánsöm að eignast sameiginleg áhugamál sem við gátum öll notið saman, svo sem skíðaíþróttina og golfið. Við fórum í nokkrar skíðaferðir, ásamt skíðafélögunum okkar, til Austurríkis og Ítalíu sem var algjört ævintýri. Þegar skíðaferðirnar fóru að verða okkur heldra fólkinu of áhættusamar fluttum við okkur alfarið yfir í golfið. Það leiddi til þess að við fórum saman í margar golfferðir til Flórída og Spánar og eigum við margar mjög góðar minningar um þær ferðir.
Í gegnum árin vorum við Kiddý mjög samstíga í mörgu, vorum saman í ýmsum hópum og klúbbum. Það er ærið verkefni að telja þá alla upp hér, en ég kemst ekki hjá því að nefna saumaklúbbinn, leikfimishópinn Langreisurnar, skíðahópinn og bridgeklúbbinn. Hennar verður sárt saknað hjá okkur öllum, en mikið tóm hefur nú myndast þegar Kiddý er ekki lengur meðal okkar.
Elsku Buggi, Anna, Elín, Nonni og fjölskyldur, við fjölskyldan vottum ykkur okkar dýpstu samúð.
Hvíl í friði elsku Kiddý. Við tökum vinskapinn upp aftur síðar.
Margrét og Jóhannes (Systa og Jói).
Kiddý reyndist okkur fjölskyldunni ákaflega vel alla tíð og má segja að hún hafi fylgt Margréti eftir og verið henni til halds og trausts eftir fráfall mömmu, auk þess sem hún stóð með pabba okkar í einu og öllu, ekki síst eftir að mamma féll frá. Einstök vinátta var á milli þeirra sem við systkinin verðum ævinlega þakklát fyrir. Þegar pabbi okkar tók saman við Lilju þá minnkuðu ekki ferðalögin, matarboðin eða símtölin hjá þeim vinunum. Kiddý átti það líka til ef pabbi okkar svaraði ekki símanum að hringja í Margréti og spyrja: „Hvar er pabbi þinn?“
Það sem var svo skemmtilegt við Kiddý er að það var aldrei þögn í kringum hana. Hún var ekki endilega að segja sögur af sjálfri sér en hún var algjör meistari í raðspurningum til viðmælanda sinna. Við bræður efumst stórlega um að nokkur annar Íslendingur hafi spurt jafn margra spurninga og Kiddý.
Kiddý studdi Sigga alltaf með ráðum og dáð í bæjarstjórnarpólitíkinni og lét alltaf vita ef henni fannst eitthvað vanta eða mætti betur fara í Garðabæ. Yfirleitt gerði hún það með því að spyrja spurninga og fá svör og ef henni mislíkuðu svörin eitthvað þá endaði hún samtalið bara svona: „Ég bara skil ekkert í þessu.“ Var það þá ábending um að rétt væri nú að hugsa þetta eitthvað aðeins betur.
Elsku Kiddý okkar, við vitum að þín bíður útbreiddur faðmur móður okkar í sumarlandinu. Takk fyrir allt sem þú hefur gert fyrir okkar fjölskyldu.
Elsku Buggi, Nonni og Linda, Ella, Anna og Kári, barnabörn og barnabarnabörn, innilegar samúðarkveðjur.
Sigurður Guðmundsson,
Einar Gunnar Guðmundsson og Margrét Björg Guðmundsdóttir.