Með ströngustu kröfum í Evrópu

Eydís Rós er með marga bolta á lofti. Nýlega settist hún í stjórn FKA og sinnir félagsstörfunum samhliða því að reka Vélsmiðju Ingvars Guðna og Kjúklingabúið Vor með manni sínum Ingvari Guðna Ingimundarsyni.

Vélsmiðjan fagnar 20 ára afmæli á þessu ári og í sumar voru tvö ný eldishús tekin í notkun á kjúklingabúinu, hvort um sig tæplega 900 fermetrar að stærð.

Hverjar eru helstu áskoranirnar í rekstrinum

þessi misserin?

Í járninu er það fyrst og fremst gífurlega hátt verð á hráefni sem lætur á sér kræla núna og svo hefur einnig borið á hráefnisskorti hérlendis sem má að einhverju leyti rekja til kórónuveirufaraldursins.

Verð á galvanhúðun hérlendis er einnig hátt sem hefur auðvitað áhrif á samkeppnismöguleika okkar við innflutta vörur af svipuðum toga. Við höfum heyrt að þetta sé farið að valda því að smíðaverkefni séu nú þegar farin að færast úr landi, þá bæði smíðin og galvanhúðunin.

Í kjúklingabúskapnum hefur reglugerð um velferð alifugla verið til endurskoðunar í ráðuneyti í nokkur ár sem er hamlandi fyrir nýjustu húsin okkar sem við tókum í notkun í sumar. Núgildandi reglugerð kveður á um að í nýjum húsum megi vera með mun minni framleiðslu á hvern fermetra en í eldri og lakari húsum. Reglugerðin sem við vinnum nú eftir er mun strangari og kostnaðarsamari heldur en kollegar okkar í Evrópu vinna eftir. Í ljósi þess má öllum vera ljóst hvað samkeppnisstaða okkar er erfið við innflutning á kjúklingakjöti en sá innflutningur er orðinn mjög mikill.

Hver var síðasta ráðstefnan

sem þú sóttir?

Síðasta ráðstefna sem ég sótti var 14. október sl. en það var Jafnvægisvogin sem haldin var í RÚV. Jafnvægisvogin er hreyfiaflsverkefni unnið í samstarfi með forsætisráðuneytinu, Sjóvá, Deloitte, RÚV og Pipar\TBWA. Mjög fróðleg erindi sem voru flutt þar úr mismunandi áttum úr atvinnulífinu. VIG ehf. var einnig í hópi viðurkenningahafa þetta árið og erum við mjög stolt að því að leggja okkar af mörkum í verkefnið.

Hugsarðu vel um líkamann?

Ég reyni að fara þrisvar í viku í ræktina á Selfossi. Það er allur gangur á því hvernig gengur að standa við það loforð. Þá fer ég í hópatíma í Kraftbrennslunni og æfingin er blanda af lyftingum, þoli og liðleika. Það gefur mér aukna orku að stunda líkamsrækt svo ég reyni mitt besta að sinna því vel. Við hjónin höfum líka verið að hjóla svolítið saman bæði á malbikinu og svo utan vegar – það er hrikalega skemmtilegt.

Hvernig heldurðu

þekkingu þinni við?

Ég er dugleg að lesa greinar héðan og þaðan sem tengjast búskapnum. Svo er ég að fara til Noregs á norræna ráðstefnu um málefni alifugla í næstu viku. Norðurlöndin hafa átt í markvissu samstarfi til þó nokkuð margra ára og skiptast á að halda þessa ráðstefnu og skipuleggja fróðleg og fjölbreytt erindi.

Einnig hefur starf FKA fært mér alls konar tækifæri sem hafa klárlega bætt þekkingu mína. Þegar maður er í eigin rekstri er svo mikilvægt að eiga samtal við aðila sem fást við sambærileg verkefni þó þau geti kannski verið á allt öðru sviði.

Hvaða lögum myndirðu breyta ef þú værir einráð í einn dag?

Ég hugsa að ég myndi kíkja á lög um gjaldmiðil Íslands – það þarf eitthvað endurskoða þau mál. Eins og hugmyndin um séríslenska krónu er falleg þá er það því miður staðan að með tilkomu allrar þeirrar tækni og framfara sem hafa orðið í heiminum þarf að endurskoða gjaldmiðilinn okkar og hvað hann er í raun að kosta okkur. Því til rökstuðnings má benda á að allnokkur stór fyrirtæki hér á landi kjósa að gera upp í erlendum gjaldmiðli.

Hvert væri draumastarfið ef þú þyrftir að finna þér nýjan starfa?

Ég held að það væri innan tölvu- og tæknigeirans í einhvers konar forritun. Ég hef alltaf verið smá tölvu- og tækninörd í mér og almennt pínu „tækjasjúk“. Held að það sé alveg ljóst að framtíðin mun fela í sér gífurlegar breytingar og þróun í þessum geira og það væri gaman að vera með í ævintýrinu.

Hvað myndirðu læra ef þú fengir að bæta við þig nýrri gráðu?

Ég hugsa að ég myndi láta verða af því að skella mér í MBA-nám í Háskólanum í Reykjavík. Ég hafði alltaf séð það fyrir mér að kýla á það eftir viðskiptafræðina. Námið er mjög praktískt fyrir fyrirtækjaeigendur og stjórnendur. Ég tel að það myndi færa mér ný tækifæri í reksturinn og mögulega frekari vöxt.