Stefán E. Stefánsson ses@mbl.is Samkvæmt áætlunum Reykjavíkurborgar munu hreinar skuldir og skuldbindingar A-hluta nema 180 milljörðum króna árið 2025.

Á fyrstu tíu mánuðum ársins greiddu íbúar Reykjavíkur 69,4 milljarða króna í útsvar til sveitarfélagsins, er það 8,6% hækkun frá síðasta ári þegar útsvarsgreiðslurnar námu 63,8 milljörðum króna. Þetta má lesa út úr uppfærðu talnaefni Sambands íslenskra sveitarfélaga. Þar má einnig sjá að frá síðustu sveitarstjórnarkosningum árið 2018 hafa útsvarstekjurnar á verðlagi hvors árs hækkað um 16%.

Nemi hækkanir útsvarstekna sama hlutfalli það sem eftir líður þessa árs eins og verið hefur á fyrstu 10 mánuðunum munu þær þegar árið verður gert upp nema 85 milljörðum eða tæpum 7 milljörðum meira en á árinu 2020.

Skuldirnar hlaðast upp

Sé hin mikla tekjuaukning sett í samhengi við skuldasöfnun borgarinnar koma forvitnilegir hlutir í ljós. Þannig má lesa út úr greinargerð með fjárhagsáætlun borgarinnar að hreinar skuldir og skuldbindingar borgarinnar muni nema 123 milljörðum króna í lok þessa árs og að hlutfall þeirra af tekjum borgarinnar (útsvarstekjum, fasteignagjöldum o.fl.) muni verða 91,7%. Hins vegar er gert ráð fyrir því, líkt og meðfylgjandi súlurit sýnir, að skuldirnar muni hækka gríðarlega á komandi árum og nema 180 milljörðum króna í árslok 2025. Strax árið 2023 mun hlutfall skulda og skuldbindinga af tekjum hafa náð 110% af tekjum borgarinnar. Sé horft til breytinga milli áranna 2019 og 2023 sést því glögglega að skuldahlutfallið versnar um rúm 100% á fjórum árum.

Enn mun syrta í álinn

Samkvæmt áætlunum borgarinnar munu skuldahlutföllin áfram versna á árinu 2024 og nema 112,1% af tekjum. Hins vegar er gert ráð fyrir að hlutfallið lækki aftur í 107,6% árið 2025, á þriðja ári næsta kjörtímabils.

Segir í greinargerð borgarinnar að það sé fyrst og fremst vegna fjárfestingarátaks sem skuldir og skuldbindingar muni hækka en að stefnt sé að niðurgreiðslu skulda frá og með árinu 2025.