Þó að Sólveig Anna Jónsdóttir sé hætt sem formaður Eflingar er hún ekki hætt að efna til ófriðar innan verkalýðshreyfingarinnar og sennilega ekki heldur utan hennar. Í gær gerðist það að kosinn var nýr 3. varaforseti Alþýðusambands Íslands í stað Sólveigar Önnu, en í stað þess að óska eftirmanninum til hamingju notaði Sólveig Anna tækifærið á Facebook í gær til að skrifa langan pistil um það hve ómögulegur eftirmaðurinn, Halldóra Sveinsdóttir, sé.
Halldóra er formaður verkalýðsfélagsins Bárunnar á Suðurlandi og hefur setið í miðstjórn ASÍ og gegnt fjölda annarra trúnaðarstarfa fyrir verkalýðshreyfinguna. Þetta dugar ekki til að Sólveig Anna telji hana nothæfa í baráttuna, því að Halldóra sé „manneskja bakherbergisins, hins notalega klúbbs þar sem verkalýðsleiðtogar gleðjast yfir að fá „sæti við borðið“ og láta mata sig á kynningum sérfræðinga“.
Helsti löstur Halldóru virðist að mati Sólveigar Önnu vera að hún hlusti á röksemdir og að hætta sé á að hún taki tillit til efnahagsaðstæðna við gerð kjarasamninga.
Þetta telur formaðurinn fallni afleita afstöðu enda krefst „baráttan“ þess að ekkert sé hlustað og ekki tekið mark á nokkurri staðreynd um efnahagsmál. Í baráttu sósíalista er þekkt að allt verður að víkja fyrir málstaðnum og það endurspeglast í ofsanum, óbilgirninni og óheftum fjandskapnum gegn þeim sem voga sér að hafa ólíka skoðun.
Til baka
Leita í greinasafni
Prenta grein