Helgi R. Einarsson sendi mér „smá hugdettur“:
Prinsipp
Svandís er hrifin af sveinum,
en sefur þó aldrei hjá neinum,
því prinsippið er
með piltana hér
að halda þeim öllum hreinum.
Þessi er úr annarri átt.
Uppgjör
Eftir að Birna barði
Varða frá Vinaskarði
brosti' ún til Barða,
sem það bros lét sig varða,
enda vildi' ana fyrr en (V) varði.
Magnús Geir Guðmundsson sagði á þriðjudag: „Nú rauk'ann upp líka nyrðra!“ og orti:
Nú hraustlega rífur í runnann
og riðar mín öskutunnan.
Líkt og oft áður,
er ófriður bráður.
Andskotans sending að sunnan!
Ég fékk góðan póst: Bessi Vésteinsson og Ýtu-Bjarni unnu á dögunum við að brjóta ný tún í Skagafirði. Gunnar Rögnvaldsson orti:
Spái ég að spilda þessi
spretti vel er hækkar sól.
Þar sem Ýtu-Bjarni og Bessi
báðir unnu með sín tól.
Þórarinn Eldjárn yrkir á Degi íslenskrar tungu, afmælisdegi Jónasar Hallgrímssonar:
Örkum nú þrátt fyrir ágjöf og fjúk
áfram þennan veg.
Tungan er auðlind sem eflist við brúk
endurnýjanleg.
Gunnar Hólm Hjálmarsson orti á Boðnarmiði „í tilefni dagsins“:
Dugar jafnt í dagsins önn
sem draumi skáldsins spuna.
Sjaldan vefst þeim tunga um tönn
sem tala íslenskuna.
Og Magnús Halldórsson yrkir „Bullvísa í tilefni dagsins“:
Lafhræddur Sæfinnur sigldi,
samstundis henni frá.
Þegar að ögldin sig ygldi,
öldujónum hjá.
Magnús Geir Guðmundsson kveður og kallar „Dag íslenskrar tungu 2021“:
Meðan áfram dreg loft í lungu,
á lífsskeiði ennþá svo ungu.
Vil ég andlega efnast
og auðmjúkur nefnast.
Ástmögur íslenskrar tungu!
Halldór Blöndal
halldorblondal@simnet.is