KSÍ
Bjarni Helgason
Víðir Sigurðsson
„Þetta eru vissulega erfið mál en við fögnum því engu að síður að það sé komin niðurstaða hjá úttektarnefndinni,“ sagði Vanda Sigurgeirsdóttir, formaður KSÍ, í samtali við Morgunblaðið eftir að úttektarnefnd ÍSÍ kynnti í gær niðurstöður sínar, þar sem viðbrögð og málsmeðferð KSÍ vegna kynferðisofbeldismála sem tengst hafa leikmönnum í landsliðum Íslands voru skoðuð ítarlega.
Nefndina skipuðu Kjartan Bjarni Björgvinsson héraðsdómari sem var formaður hennar, Hafrún Kristjánsdóttir sálfræðingur og Rán Ingvarsdóttir lögfræðingur.
„Við lítum svo á að þetta sé enn eitt púslið í þeirri vegferð sem við erum á að gera góða hreyfingu ennþá betri. Þetta er mjög vönduð skýrsla í alla staði og í henni eru góð ráð og punktar sem við munum halda áfram að vinna með í okkar stefnumótun.“
Viljum að allir séu öruggir
„Starfshópur á vegum ÍSÍ er að vinna að því að endurskoða allar reglur innan íþróttahreyfingarinnar í þessum málaflokki, sem er mjög jákvætt. Við viljum að okkar fólk og allir sem eru hluti af hreyfingunni séu örugg í okkar umhverfi og það er ástæðan fyrir því að við fórum af stað í þessa vinnu til að byrja með,“ sagði Vanda.
Stjórn KSÍ mun fara ítarlega yfir skýrslu úttektarnefndarinnar á stjórnarfundi sambandsins í næstu viku.
„Núna mun ég setjast niður með starfsfólki og stjórn KSÍ þar sem við munum fara ennþá betur yfir það sem kemur fram í skýrslu úttektarnefndarinnar.
Þetta eru góð gögn með miklum upplýsingum og það er okkar að greina hana eins og best verður á kosið.
Þetta eru flókin mál sem tekur tíma að vinna úr. Við þurfum að vanda okkur og fylgja settum reglum og lögum auðvitað þar sem vinnuverndar- og persónuverndarlög eru ekki brotin.“
Aðspurð hver væru næstu skref sambandsins í þessum málaflokki sagði Vanda:
„Við höfum rætt það innan sambandsins að boða til blaðamannafundar þegar við höfum farið betur yfir skýrsluna en fyrst þurfum við að fá að leggjast almennilega yfir þetta.“
Ítarlegar niðurstöður
Í ítarlegum niðurstöðum í skýrslunni kemur m.a. fram að Guðni Bergsson, formaður KSÍ, og Klara Bjartmarz framkvæmdastjóri hafi 3. júní 2021 haft vitneskju um að frásögn um alvarlegt kynferðisofbeldi sem birtist í opinni færslu á Instagram tæplega mánuði áður tengdist tveimur leikmönnum í A-landsliði Íslands. Þar er vísað til atviks í Kaupmannahöfn árið 2010.
*Starfsmaður KSÍ, sem er tengdamóðir viðkomandi konu, hafi rætt málið ítrekað við þau bæði og Guðni rætt við annan leikmannanna.
*Ljóst sé að stjórnarfólki KSÍ hafi verið ókunnugt um tengslin og frásögn af kæru en tölvupóstssamskipti í stjórn KSÍ gefi það eindregið til kynna.
*Ekki sé hægt að sjá að framganga stjórnar, framkvæmdastjóra eða annarra starfsmanna varðandi meðferð frásagna um ofbeldi beri einkenni þöggunar- og nauðgunarmenningar umfram það sem almennt gerist í samfélaginu.
*Þáverandi formaður KSÍ, Geir Þorsteinsson, hafi ásamt fleirum innan sambandsins haft vitneskju um tilkynningar um ólæti og grun um heimilisofbeldi á dvalarstað leikmanns landsliðsins 5. júlí 2016, eftir heimkomu landsliðsins frá EM í Frakklandi.
*Athugunarvert sé að formaðurinn hafi rætt við almannatengil vegna málsins, þrátt fyrir skýringar um að málið hafi aldrei verið „formlega á borði KSÍ og um einkalíf leikmannsins var að ræða“.
*KSÍ hafi brugðist strax við ábendingu um að lögregla hefði til meðferðar kæru vegna ofbeldis leikmanns á skemmtistað haustið 2017 og sent hann úr landsliðsverkefni.
*Niðurstöðurnar eru birtar í heild sinni á mbl.is/sport ásamt yfirlýsingu Guðna Bergssonar.