Guðný Þórarinsdóttir fæddist á Blönduósi 1. ágúst 1943. Hún lést á HSN Blönduósi 29. nóvember 2021.
Foreldrar hennar voru Helga Kristjánsdóttir og Þórarinn Þorleifsson, bæði látin.
Maki Guðnýjar er Óskar Sigurfinnsson, foreldrar hans voru Björg Erlendsdóttir og Sigurfinn Jakobsson, bæði látin. Börn Guðnýjar og Óskars eru: 1) Þóranna Björg, f. 12.11. 1960, gift Þorsteini Björnssyni. 2) Hólmfríður Sigrún, f. 31.10. 1961, í sambúð með Vigni Björnssyni. 3) Þorleifur Helgi, f. 13.1. 1963, giftur Þóreyju Guðmundsdóttur. 4) Júlíus Árni, f. 1.12. 1964, í sambúð með Dýrfinnu Vídalín Kristjánsdóttur. 5) Hulda Björk, f. 20.8. 1966, d. 14.10. 1971. Afkomendur þeirra eru á fimmta tug.
Útför Guðnýjar fer fram frá Blönduóskirkju í dag, 11. desember 2021, klukkan 14. Hægt er að nálgast vefstreymi á face
booksíðu Blönduóskirkju.
Ég man það elsku mamma mín,
hve mild var höndin þín.
Að koma upp í kjöltu þér
var kærust óskin mín.
Og ennþá rómar röddin þín,
svo rík í hjarta mér.
Er nóttin kemur dagur dvín,
í draumi ég er hjá þér.
(Jenni Jónsson)
Móðir mín, Guðný Þórarinsdóttir, góð, velviljuð, lífsglöð og hjartahlý kona, er gengin. Í mínum huga er minningin um mömmu fyrst og fremst minning um mannvin sem ekki unni sér hvíldar ef hjálpa þurfti öðrum, ættingjum, vinum eða sveitungum. Mamma bar djúpa virðingu fyrir lífinu og gjöfum jarðar og það sama hefur hún lagt áherslu á við sína nánustu. Hún lagði mikið upp úr að hrósa og hvetja börn og barnabörn og aðra sem hún var í samskiptum við. Gott var að hafa mömmu til að „fletta“ upp í ef muna þurfti afmælisdag eða vita ættartengsl og annað sem tengdist mannlífinu. Hún var ótrúlega minnug og vel upplýst. Þegar stund gafst frá daglegum önnum í sveitinni prjónaði hún og heklaði og nutu ófáir afraksturs þeirrar miklu og vönduðu framleiðslu. Þegar aldur færðist yfir og krankleiki herjaði á var hún endalaust að þakka fyrir alla aðstoð og hlýju sem hún og pabbi fengu frá vinum og ættingjum. Móðir mín var verndari minn, fyrirmynd og vinur. Ég get aldrei nógsamlega þakkað að hafa fengið að eiga hana að allt mitt líf, læra af henni og fá að hafa hana með mér áfram í minningunni til æviloka.
Sigrún Óskarsdóttir.
Ragnhildur og Sigurður,
Merkjalæk.