Hermenn í stjórnarher Súdans skutu í gær táragasi að mótmælendum í höfuðborginni Kartúm, sem safnast höfðu saman til að mótmæla valdaráni hersins í október síðastliðnum.
Ástandið í landinu varð enn flóknara um helgina þegar Abdalla Hamdok forsætisráðherra sagði af sér á sunnudaginn, en hann sagði að landið stæði á hættulegum krossgötum sem gætu táknað endalok þess sem sjálfstæðs ríkis.
Bandaríkin, Evrópusambandið, Bretland og Noregur lýstu því yfir í gær að þau myndu ekki styðja forsætisráðherra eða ríkisstjórn sem ekki nyti stuðnings meðal borgaralegra afla, en óttast er að herinn hyggist skipa eftirmann Hamdoks úr eigin röðum.