Helgi Bjarnason
helgi@mbl.is
Lokið hefur verið við að rífa gömlu útvarpsstöðina á Vatnsendahæð og möstrin sem þar voru. Eitt útvarpsmastur verður eftir til minja um starfsemina sem þar var auk þess sem það þjónar byggðinni í kring. Settur verður upp trépallur með bekkjum við mastrið ásamt upplýsingaskilti um starfsemina sem þarna hefur verið og útbúið útivistar- og leiksvæði.
Ríkið átti land undir mannvirkjunum efst á Vatnsendahæð en hefur nú selt Kópavogsbæ það. Bærinn er að skipuleggja íbúðabyggð allt í kring, um 500 íbúðir, sem byggð verður upp í áföngum.
Unnið að frágangi svæðisins
Efst á hæðinni stóð hús, gamla útvarpsstöðin, sem var orðið ónýtt. Ákveðið var að rífa það og útvarpssmöstrin enda búið að flytja sendibúnað RÚV upp á Úlfarsfell.Verktaki hefur unnið að því og er búið að fjarlægja mannvirkin. Þórhallur Ólafsson, framkvæmdastjóri Neyðarlínunnar, segir að áfram verði unnið að frágangi svæðisins og að bera möl ofan í það. Raunar er eftir að fjarlægja eitt mastur sem er aðeins lengra frá en það verður einnig gert enda á að rísa einbýlishús þar.
Þórhallur segir að við hlið mastursins sem fær að standa verði trépallur með bekkjum og skilti með fróðleik um starfsemina á svæðinu. Þá verði útbúið útivistarsvæði og leiksvæði fyrir börn.
Neyðarlínan stendur fyrir þessum framkvæmdum, fyrir hönd ríkisins, í samvinnu við RÚV og Kópavogsbæ.