Stór augu. S-Allir Norður &spade;ÁG87 &heart;3 ⋄ÁG5 &klubs;KG1094...

Stór augu. S-Allir

Suður spilar 5♠ doblaða.

Boye Brogeland rak upp stór augu. Hann var sagnhafi í 5♠ dobluðum og fékk út ♦K frá Christian Bakke. Boye drap á ás og spilaði strax litlu laufi. Tor Eivind Grude í austur hafði aldrei nefnt áttlitinn í laufi á nafn og fylgdi sakleysislega lit með smáspili. Boye trompaði með spaðatvisti og Christian yfirtrompaði með fjarka! Menn hafa glennt upp glyrnurnar af minna tilefni. Framhaldið var óhjákvæmilegt: ♥Á, ♦D og stunga. Tveir niður.

Spilið er frá úrslitaleik norskra sveita – Crazies og Norway Juniors – í netmóti BSÍ á dögunum. Sami samningur vannst á hinu borðinu eftir útspil í trompi. Þar tók sagnhafi (hinn 14 ára Nicolai Heiberg-Evenstad) annað tromp og fríaði svo tvo slagi á lauf með trompsvíningu. Leikurinn var 56 spil og unnu „júníorarnir“ 119-106. Fjórði maðurinn í sveitinni skýrir gæsalappirnar, en það er Stian Evenstad, faðir Nicolais.