Margrét Þóra Þórsdóttir
Akureyri
Slökkviliðið á Akureyri hefur fengið nýjan björgunarstigabíl sem leysir af hólmi eldri körfubíl sem er frá árinu 1989. Stigabíllinn er af gerðinni Scania, stiginn og yfirbyggingin var smíðuð í Frakklandi og eru fulltrúar seljenda bílsins væntanlegir til Akureyrar þar sem kenna á nokkrum liðsmönnum á bílinn. Þeir munu í kjölfarið miðla af þekkingu sinni til allra annarra starfsmanna slökkviliðsins.
Maron Pétursson, deildarstjóri hjá slökkviliðinu á Akureyri, segir að með tilkomu nýja bílsins verði gríðarleg breyting til hins betra þegar kemur að björgunarstörfum. Nýi bíllinn er búinn margvíslegum nútímaþægindum sem þann gamla skortir. Það flýtir fyrir öllum ferlum og auðveldar störf hvort heldur er unnið við að bjarga mannslífum eða verðmætum.
Hann segir eldri bílinn ekki henta lengur, víða hátti þannig til á Akureyri að götur séu þröngar og erfitt að komast um á svifaseinum bíl. Farið var að ræða um bílaskipti fyrir sjö árum, en tímamót urðu í október árið 2020 þegar skrifað var undir samning um kaup á Scania-bílnum. „Það hafa svo eins og gengur á tímum heimsfaraldurs orðið tafir á afhendingu, en loks er bíllinn kominn norður og má segja að langþráður draumur okkar hafi ræst,“ segir Maron.