Töluverðir hagsmunir undir

Gunnlaugur Snær Ólafsson

gso@mbl.is

„Maður hefur auðvitað áhyggjur af þessu. Maður veit ekkert hvað tekur við,“ segir Hrafnkell Tulinius, framkvæmdastjóri skipahönnunarstofunnar Nautic. Félagið hefur átt í miklum viðskiptum í Rússlandi undanfarin misseri og hefur byggt upp dótturfélag í St. Pétursborg með 57 starfsmenn.

Hann kveðst nýverið kominn heim úr söluferð í austurhluta Rússlands ásamt öðrum íslenskum fyrirtækjum sem þjónusta rússnesk útgerðarfyrirtæki. „Þar heimsóttum við tólf viðskiptavini og sáum mörg spennandi tækifæri. Það væri auðvitað sorglegt ef þau tækifæri leystust upp. Maður veit ekkert hvernig þessar þvingunaraðgerðir verða.“

Rekstur dótturfélagsins Nautic Rus mun halda áfram óbreytt en helsta óvissan sé tengt fjármagnsflutningum milli landa, að sögn Hrafnkels. Ógnin sé að ekki verði hægt að fá greitt fyrir þjónustu sem veitt hefur verið ef flutningur fjármagns verður stöðvaður. „Það eru búnar að vera vera miklar yfirlýsingar og þetta eru gríðarlegir fjármunir sem eru undir fyrir félögin sem hafa verið að selja inn á Rússland.“

Hrafnkell segir Nautic þó ekki verða tekjulaust þar sem fyrirtækið hafi einnig verkefni annars staðar og bendir á smíði 48 metra togara í Tyrklandi fyrir íslenska útgerðarfyrirtækið Ramma. „Við vorum sem betur fer búnir að fá afhent stálið í skipið frá Úkraínu.“

Vona það besta

„Maður veit ekkert,“ svarar Bjarni Þór Gunnlaugsson, framkvæmdastjóri Naust Marine, er blaðamaður spyr hver hann telji áhrifin af hugsanlegum þvingunaraðgerðum verði á fyrirtækið sem hefur undanafarin ár selt töluvert af togvindum og vindukerfum til Rússlands. „Það er óvissa hjá öllum, ekki síður hjá viðskiptavinum okkar.“

Bjarni Þór kveðst ekki vilja spá fyrir um áhrif aðgerða. „Við verðum bara að bíða og vona það besta.“ Hann hefur ekki sérstakar áhyggjur af því að fjárflutningar stöðvist og að ekki fáist greitt fyrir vörur sem þegar hafa verið seldar, þar sem Naust Marine hafi einnig stofnað dótturfélag í Rússlandi sem mun annast þau mál á meðan ástand ríkir.