Ragnar Hjaltason

Þegar við minnumst Ragnars vinar okkar koma upp í huga margar gamlar minningar frá uppvaxtarárum okkar í Ólafsfirði og skólaárum á Varmalandi. Ragnar var fluttur til Ólafsfjarðar aðeins tveggja daga gamall til ömmu sinnar Guðfinnu Ástu, þar sem hann ólst upp við mikla fátækt í litlu húsi sem stóð við Kirkjuveg, en er löngu horfið. Þetta hús nefndist Leyningur og var Ragnar af heimamönnum ávallt kenndur við það nafn.

Á uppvaxtarárum Ragnars vakti hann athygli okkar strákanna og annarra hve fjölhæfur hann var í öllum leikjum og íþróttum þeirra tíma. Hann er orðinn sextán ára þegar hann missir ömmu sína, þá eftirminnilegu konu. Þá ræður hann sig sem háseta á Norðlending, fyrsta togara sem gerður var út frá Ólafsfirði. Þá hefst sjómannsferill hans. Hann starfaði sem sjómaður mestan hluta ævinnar sem háseti og stýrði á fjölda báta og togara. Síðar gerðist hann útgerðarmaður og skipstjóri á eigin bátum. Um tíma átti hann og rak sendibílastöð í Hafnarfirði. Auk þess kom hann að ýmsum öðrum rekstri. Velgengni og farsæld Ragnars á löngum starfsferli var að þakka dugnaðinum, útsjónarseminni og ábyrgðinni fyrir þeim verkefnum sem hann tók sér fyrir hendur.

Fyrir nokkrum árum ákváðu þau hjón að flytja til Ólafsfjarðar og njóta þar ævikvöldsins, en þá voru þau varla búin að koma sér fyrir þegar Ragnar fékk heilablóðfall, og eftir það mátti hann lifa við mikla fötlun.

Börnum hans sendum við samúðarkveðjur okkar.