Valdimar Víðir Gunnarsson

Þú ert farinn frá okkur elsku pabbi. Sárt er og erfitt að lýsa tilfinningunum sem fylgja því að hugsa til allra góðu stundanna okkar saman. Alltaf brosandi, stutt í glensið. Þú settir alltaf upp spes augnráð og blikk með þegar þú sást að við skildum sneiðina. Sérstaklega var gaman þegar mamma var nálægt og hún mátti ekki heyra neitt; því þá sagði hún alltaf: „Víðir hættu þessu nú.“ Það fannst okkur svo fyndið og þú hlóst inni í þér því hún mátti ekki heyra það. Svo mikill húmoristi alltaf.

Fjöldi fólks hefur haft samband við okkur systkinin, símleiðis og í gegnum samfélagsmiðla til að votta samúð yfir fráfalli þínu. Margar fallegar kveðjur og orð um góðar minningar sem svo margir eiga með þér. Allir sem við höfum talað við eru sammála um að ljúfari mann var vart að finna. Þú varst heill í gegn, alltaf svo góður og hjartahlýr við alla sem voru nálægt þér.

Þú varst svo bóngóður og alltaf til staðar þegar þurfti hlýjan faðm eða þegar við þurftum spjall um eitthvað sem okkur lá á hjarta. Öll höfum við upplifað að sitja í hlýjum faðminum á þér grátandi, þú alltaf tilbúinn að knúsa og segja að allt færi vel, tíminn lækni öll sár. Aldrei vorum við skömmuð þrátt fyrir að eiga það stundum skilið. Frekar ræddirðu við okkur á þinn rólega máta. Alltaf skilningsríkur og svo hlýr. Þannig varstu bara.

Við munum sakna þess að heyra þig spila á nikkuna. Við minnumst góðra stunda þegar þú sast við orgelið og spilaðir lög sem þér voru kær. Þú varst líka ansi góður að spila á gítar og munnhörpu. Það var mikil músík í þér og höfum við öll notið góðs af því, tónlist skiptir okkur öll miklu máli. Þetta áhugamál var þér mikilvægt og við erum sannfærð um að margir eiga einnig eftir að sakna þess að heyra þig spila alveg eins og við gerum. Á síðustu árum spilaðirðu fyrir eldri borgara í Gerðubergi og einnig í húsinu sem þú bjóst í með mömmu. Þau koma öll til með að sakna þín eins og mörg þeirra hafa sagt. Þú þekktir alla og þér fannst gaman að kynnast nýju fólki. Þú varst svo opinn og mannblendinn, hafðir svo gaman af því að spjalla við aðra. Það eru bara góðar minningar í huga okkar allra sem tengjumst þér og lífi okkar með þér.

Mikið verður erfitt að sjá þig ekki aftur og knúsa þig og kyssa. Skrítið að hugsa til þess að eftir 60 ár með mömmu sértu ekki lengur hér. Þú varst alltaf svo góður við mömmu og þú hafðir alltaf áhyggjur af öllu sem kom henni við. Þú vildir alltaf vera til staðar fyrir hana og það varstu svo sannarlega. Þið voruð sem eitt og styrktuð hvort annað í gegnum allt ykkar líf, sem bæði hefur litast af gleði og sorg. Mamma átti þig alltaf að og þú sagðir alltaf við okkur að þú elskaðir hana svo mikið. Hennar missir er mikill og hún saknar þín svo sárt. Við lofum því að við munum alltaf passa hana fyrir þig og sjá til þess að henni líði vel og hafi það sem best.

Elsku pabbi okkar, við sjáumst næst á staðnum sem við förum öll á að lokum. Ef einhver fær inngöngu í himnaríki þá ert það þú.

Þín elskandi börn,