Nýbygging Hér er horft að Gamla Garði úr suðurátt. Viðbyggingin þurfti að tala við umhverfi sitt og hið stærra samhengi háskólasvæðisins, segja arkitektar hússins í umsögn sinni um verkið.
Nýbygging Hér er horft að Gamla Garði úr suðurátt. Viðbyggingin þurfti að tala við umhverfi sitt og hið stærra samhengi háskólasvæðisins, segja arkitektar hússins í umsögn sinni um verkið. — Morgunblaðið/Kristinn Magnússon
Nýtt og gamalt Nýbyggingin sést hér austan við hinn upprunalega Gamla Garð, sem var byggður árin 1933-34.
Tenging Húsin eru tengd með glerbyggingu sem snýr að Hringbraut.
Innanhúss Viður og litir vísa í eldra hús ásamt sjónsteypu og stáli og mætast þar gamli og nýi tíminn. Mildir litir eru áberandi á göngum nýbyggingar.
[ Smellið til að sjá stærri mynd ]
Baksvið Sigtryggur Sigtryggsson sisi@mbl.is Viðbygging við elsta stúdentagarð háskólans, Gamla Garð, var vígð í október í fyrra.

Baksvið

Sigtryggur Sigtryggsson

sisi@mbl.is

Viðbygging við elsta stúdentagarð háskólans, Gamla Garð, var vígð í október í fyrra. Viðbyggingin fór strax í útleigu og fylltist eins og skot, segir Guðrún Björnsdóttir, framkvæmdastjóri Félagsstofnunar stúdenta. Guðrún segir að íbúarnir séu mjög ánægðir með aðstöðuna og hún heyri ekki betur en háskólasamfélagið sé mjög sátt við bygginguna.

Um er að ræða tvær byggingar og þar eru 69 einstaklingsherbergi með sérsalerni. Þá eru þar setustofur, samkomusalur og sameiginleg eldhúsaðstaða sem styrkir mjög félagslega þáttinn með því að hvetja til samskipta og minnka líkur á því að nemendur einangrist.

Var byggður árin 1933-34

Gamli Garður var byggður árin 1933-34 og nýttur sem stúdentaíbúðir/sumargisting. Hinn þjóðþekkti arkitekt Sigurður Guðmundsson teiknaði húsið. Fyrstu stúdentarnir fluttu þangað inn haustið 1934. Það var árið 2016 sem farið var að undirbúa viðbyggingu við Gamla Garð.

Borgarráð samþykkti síðan í ágúst 2019 deiliskipulag fyrir svæðið byggt á tillögu Andrúms arkitekta. Að sögn arkitektanna var mikil áskorun fólgin í því að hanna og byggja á þessari viðkvæmu lóð, og í raun ekki sjálfgefið að þar yrði yfirleitt byggt. Verkefnið þurfti því að nálgast af virðingu og auðmýkt og var nálgunin sú að kallast á tillitssaman hátt á við eldra húsið. Að sama skapi þurfti viðbyggingin einnig að tala við umhverfi sitt og hið stærra samhengi háskólasvæðisins.

Með því að móta landslag lóðarinnar hafi nýbyggingin ásýnd þriggja hæða byggingar og er neðsta hæðin þannig falin. Þá var farin sú leið að byggja sem minnst fyrir ásýnd á eldra húsið og halda stefnu þess, og hefur sú nálgun, ásamt litavali úr pallettu umhverfisins, styrkt þá formheild sem skapast hefur milli þessara sögufrægu bygginga. Þetta á einnig við um hönnun og efnisval innandyra, þar sem viður og litir vísa í eldra hús ásamt sjónsteypu og stáli og mætast þar gamli og nýi tíminn á áreynslulausan en kraftmikinn hátt.

Mynda samræmda heild

Í áliti Minjastofnunar um tillögu að breyttu deiliskipulagi á lóð Háskóla Íslands vegna viðbyggingar við Gamla Garð frá 2019 kemur m.a. fram að stofnunin telur að vel hafi tekist til með aðlögun fyrirhugaðra nýbygginga að yfirbragði og formeinkennum þeirrar sögulegu byggðar sem fyrir er á háskólalóðinni næst Hringbraut. Stofnunin leggi áherslu á að áferð og litaval ytra borðs fyrirhugaðra nýbygginga myndi eðlilega tengingu við elstu byggingarnar innan reitsins, Þjóðminjasafnið, Gamla Garð og Setberg.

Pétur H. Ármannsson arkitekt og sviðsstjóri hjá Minjastofnun segir í samtali við Morgunblaðið að Andrúm arkitektar hafi haft samráð við Minjastofnun um litasetningu nýbyggingar þar sem tekið var mið af upphaflegum múrlit Gamla Garðs og steinaðri áferð nálægra bygginga, Setbergs og Þjóðminjasafnsins. „Að mínu mati tókst með þessu að mynda samræmda heild þar sem gamalt og nýtt kallast á,“ segir Pétur.

Ástæða er til að hvetja áhugafólk um húsagerðarlist til að skoða nýbygginguna við Gamla Garð.