Þuríður Antonsdóttir

Elsku mamma er fallin frá og söknuðurinn er mikill.

Þegar við dæturnar hugsum til mömmu er efst í huga okkar þakklæti.

Hún var alltaf til staðar og tilbúin að rétta fram hjálparhönd.

Frá uppvaxtarárum okkar eigum við minningar um duglega og myndarlega móður. Leysti öll verk vel af hendi hvort sem var innan- eða utandyra.

Mamma upplifði miklar breytingar á tækni og verklagi í búskapnum og var góður bóndi. Öll handavinna lék í höndum hennar og hún hafði mikla þolinmæði til að kenna okkur réttu handtökin.

Mamma bakaði bestu kleinurnar og ekki má gleyma góðu flatkökunum hennar. Dugnað hennar mátti einnig sjá þegar hún starfaði með Kvenfélaginu Bergþóru í fjölda ára.

Mamma var fyrirmynd okkar að svo mörgu leyti. Í hverju sem hún tók sér fyrir hendur sýndi hún vandvirkni og snyrtimennsku.

Hún var skipulögð og iðjusöm og við dæturnar komumst ekki með tærnar þar sem hún hafði hælana. Eftir að hún flutti á Hvolsvöll hafði hún gaman af því að komast í sveitina sína og dvelja í sumarbústaðnum.

Þá hafði hún tækifæri til að kíkja í sauðburð og alltaf tók hún þátt í árlegum verkum eins og t.d. kartöflurækt og sláturgerð, hún sá líka til þess að allt væri tilbúið og við værum nú engu að gleyma.

Þegar barnabörnin komu í heiminn var mamma ávallt tilbúin til að aðstoða og passa. Ófáar stundir sem fóru í að sinna barnabörnunum, henni og þeim til mikillar gleði.

Hún var umhyggjusöm amma, stolt af barnabörnunum og mjög umhugað um velferð þeirra.

Alltaf var hún með prjónana á lofti og ófá pör af vettlingum og sokkum rötuðu á litlar hendur og fætur.

Flestir í fjölskyldunni eru svo heppnir að eiga í fórum sínum lopapeysu prjónaða af henni.

Þín er sárt saknað, elsku mamma, þú skilur eftir stórt skarð í fjölskyldunni.

Takk fyrir allt, biðjum að heilsa pabba.

Þínar dætur,

Takk elsku amma fyrir allar yndislegu stundirnar. Kveð þig með söknuði og þakklæti.

Þinn

Elsku amma ég trúi því varla að þú sért farin. Ég á svo margar góðar minningar um þig. Tengjast þær mikið sveitinni okkar, hvort sem það var í fjósinu, fjárhúsinu eða kringum kartöfluræktina og sláturgerð á haustin.

Það var svo gaman þegar þú komst í sauðburðinn til mín og ég fékk að sýna þér litlu sætu lömbin. Ef það fæddist falleg flekkótt gimbur reyndir þú alltaf að sníkja hana af mér. Við Bryndís gáfum þér einu sinni lamb í afmælisgjöf, lambadrottninguna okkar Bryndísar. Þú varst mjög glöð og þú varst líka mjög ánægð þegar ég gaf þér sæta kálfa í afmælisgjöf. Þú varst svo mikið fyrir dýr, sérstaklega kisur.

Þú varst alltaf að prjóna og prjónaðir fullt af peysum, vettlingum og ullarsokkum á mig sem ég elskaði að fá og notaði mikið. Og núna er ég alltaf í lopapeysu sem þú prjónaðir.

Það var alltaf gott að koma til þín og fékk maður yfirleitt eitthvað gott að borða, kex,snúða eða pönnukökur.

Elsku amma mín, núna hefur þú allar kisurnar þínar hjá þér, nema Pjakk og svo ertu komin til afa.

Ég veit þú heldur áfram að passa vel upp á okkur. Takk fyrir allt sem þú gerðir fyrir mig, ég mun aldrei gleyma þér.

Guðjón Ingi.

Það voru forréttindi að alast upp og hafa ömmu sína hinum megin við götuna.

Það voru ófá skiptin sem stokkið var yfir, t.d. til að fara í pössun, fá eitthvað gott í gogginn eða bara til að njóta þess að fá að vera í rólegheitum hjá þér.

Dýrmætasta minningin er að þú kenndir okkur að prjóna og hefur okkur bara gengið nokkuð vel með það, enda lærðum við hjá þeirri bestu.

Einnig var ómetanlegt að hafa tekið þátt í flatkökubakstri með þér og munum við halda því við að baka kökurnar áfram.

Takk fyrir allt, elsku amma. Elsku amma mín. Það voru mikil forréttindi að alast upp á Grímsstöðum með ykkur afa í næsta húsi.

Það eru eflaust fáir sem ég þekki sem geyma þína mannkosti, þú varst dugleg og ákveðin kona og það var ekkert sem stoppaði þig. Það er fast í minni mínu þegar ég kom til þín á Hvolsvöll og ætlaði að gista hjá þér þegar þú hafðir verið að vesenast í gardínum og dottið. Þarna hefðu eflaust margir dottið í volæði en þú hafðir mestar áhyggjur af því að ná að skipta um sokka áður en sjúkraflutningamennirnir kæmu.

Við áttum margar skemmtilegar stundir í sveitinni þegar þú komst til okkar í sauðburðinn og varst iðulega fyrst út. Svo ég tali nú ekki um sláturgerðina á haustin, unglingurinn ég átti erfitt með að halda í við þig. Þegar mamma og pabbi fóru í frí þá komst þú að hjálpa okkur systkinunum, passa að við fengjum gott að borða og hjálpaðir okkur að mjólka.

Þó svo að gleðin hafi ekki verið mikil þegar við systkinin ætluðum að gleðja þig og mjólka snemma ... Þær mjaltir voru víst allt of snemma.

Þakklátust er ég fyrir að Júlía Björk skuli hafa kynnst langömmu sinni, hún talar mikið um þig og ég mun halda áfram að spjalla við hana um frábæru langömmu hennar. Júlía Björk segir bless og ég elska þig.

Ég vona að þið afi drekkið morgunbollann ykkar saman. Ég trúi því að þið vakið yfir mér og fjölskyldunni minni, jafnvel drekkið morgunbollann ykkar með mér.

Lovísa Guðlaugsdóttir.

Við systurnar vorum svo heppnar að hafa elsku Þuru ömmu alltaf nálægt okkur og kynntumst henni vel. Hér eru minningar og kveðjur frá okkur til hennar:

Amma var rosalega góð og mjög umhyggjusöm. Það var gaman að tala við hana. Það var notalegt að vera hjá henni, hún passaði mig mjög mikið þegar ég var lítil. Hún var mjög hæfileikarík, góð í að prjóna og baka.

Takk fyrir að vera svona góð, elsku amma.

(Helga Dögg, 14 ára)

Amma var hraust, sterk og dugleg. Hún var alltaf glöð. Hún var skemmtileg og góð. Hún bakaði svo góðar mömmukökur fyrir jólin.

Takk fyrir allt, elsku amma.

Bryndís Halla, 11 ára)

Ömmu fannst gaman að fara í sund. Hún var mjög dugleg að fara út í göngutúr. Peysurnar sem hún prjónaði voru mjög hlýjar og vettlingarnir. Hún var mjög góð í að prjóna.

Kæra amma, mér þykir svo vænt um þig.

(Dagný Lilja, 8 ára)

Amma var skemmtileg. Hún gaf okkur oft ís. Hún var mjög góð. Hún var alltaf flott. Það var gaman að spila við hana. Nú er hún glöð að hitta manninn sinn. Hún saknar okkar. Hún elskaði okkur.

Amma er örugglega að passa allar kisurnar sem eru uppi í skýjunum.

Bæ, amma. Ég elska þig.

(Þuríður Karen, 5 ára)

Þínar ömmustelpur,

Elsku amma.

Flottari fyrirmynd er ekki hægt að hugsa sér.

Þú hefur alltaf verið til staðar fyrir mig. Eins og þegar ég var lítil, þú og afi bjugguð ennþá á Grímsstöðum í stóra húsinu og við mamma og pabbi í litla húsinu.

Ef til dæmis var gat á buxum eða sokkum þá var ég fljót að fara yfir til þín og þú varst ekki lengi að gera við það.

Svo var það líka kvöldmaturinn. Ef það var ekki eitthvað gott í boði heima var ég ekki lengi að fara yfir til þín og afa og fá gott að borða.

Ég man líka vel eftir skiptunum sem þú passaðir okkur systkinin. Eitt sem ég gleymi aldrei var þegar við vildum sjá um mjaltirnar sjálf en þér leist ekkert á það. Þannig að við ákváðum að fara snemma í kvöldmjaltirnar til að fá að sanna okkur. Þú varst ekki mjög ánægð með okkur eftir það.

Við áttum margar góðar stundir saman. Ein af mínum uppáhalds var þegar ég fékk að klippa og lita hárið þitt meðan þú sagðir mér hvernig lífið var í gamla daga. Svo kannski líka þegar ég reyndi að fá þig til að kaupa eitthvað fyrir mig í vínbúðinni, en það gekk nú sjaldan upp.

Ég var svo heppin að fá að eiga heima hjá þér þegar ég var í framhaldsskóla. Þegar ég kom heim úr skólanum var búið að leggja á borð og finna til eitthvað gott að borða. Þú passaðir alltaf upp á þegar þú fórst til útlanda að það væri nóg til í ísskápnum svo ég myndi nú örugglega ekki svelta. Það var nú ekki oft sem ég fékk að setja í þvottavél heldur, en við enduðum alltaf öll kvöld á því að vaska upp og þurrka saman.

En svo er ekkert sem getur toppað góðu pönnukökurnar þínar, kleinurnar, og ekki má gleyma flatkökunum. Þú varst alltaf svo dugleg í eldhúsinu. Ekki má gleyma fallegu handavinnunni þinni, allar peysurnar sem þú hefur prjónað á mig, breytt kjólum og bætt buxur. Ég hef nú ekki erft þessa hæfileika en ég gleymi ekki þegar ég var í handavinnu í grunnskóla og kom með prjónadótið til þín, þú hafðir bara ekki vitað annað eins. Ég prjónaði svo fast að þú áttir erfitt með að rekja upp. Endaði með að þú prjónaðir þetta fyrir mig.

Það var svo gaman þegar þú komst í heimsókn til mín þegar ég var í verknámi í Osló. Og þá gat ég loksins fengið að bjóða þér í mat.

Mér finnst yndislegt að hugsa til þess þegar ég sagði þér frá því að ég ætti von á barni, honum Eyþóri Fannari mínum, og ég spyr þig hvort þú myndir vilja gera heimferðarsett fyrir mig. Það sem þú varst ánægð og spennt að fá þetta verkefni. Ég fæ tár í augun við að hugsa um það.

Það er svo mikið sem mig langar að segja þér, elsku amma mín.

Núna er afi ánægður að fá þig loksins til sín.

Sakna þín svo mikið elsku amma mín.

Elsku langa!

Takk fyrir allar vöfflurnar, pönnukökurnar, ísinn og allt sem þú gafst mér að borða. Þetta var allt svo gott.

Takk fyrir fallegu lopapeysuna sem þú prjónaðir á mig, alla vettlingana og sokkana, sem eru svo hlýir fyrir litla putta og fætur.

Þú varst alltaf svo rosalega fín, falleg og mjög dugleg.

Elska þig, langamma.