Í Vísnahorni á miðvikudag er vitnað í gamla sögu úr Eyjafirði þar sem segir að „fremsti bær í Lögmannshlíð hét fyrrum Tittlingur“. Bjarni Sigtryggsson skrifar: „Dálkahöfundur Morgunblaðsins um kveðskap leitar oft fanga hér á Boðnarmiði. Afleitt er þó er hann hefur eftir það sem rangt er og lætur undir höfuð leggjast að birta leiðréttingar, sem er þó að finna í sama þræði, líkt og hendir í dag. En þar kom fram þessi leiðrétting, sem Halldór Blöndal hefði mátt lesa og birta:
Dagbjartur Dagbjartsson segir leiðinlegt ef vísnaþáttariturum verður það á að birta einhverjar bölvaðar vitleysur. Þekki það alveg, búinn að vera í þessu í „töttögöogfemm ár“ og eitt það versta finnist sér að sjá einhverja bölvaða vitleysu sem sér hafi orðið á að birta og vitnað í sig sem frumheimild. Annars varð þessi einhvern tíma til:
Oft mér hefur valdið vöku
þó væri að basla hvað ég gat
að grípa á lofti góða stöku
og gera úr henni blaðamat.“
Ólafur Stefánsson er nýkominn frá Suðurlöndum og rómar á Boðnarmiði góðan viðurgerning og þjónustu á leiðinni heim: „Þegar búið er að vera í útlenska frauðmetinu í nokkrar vikur, þá er gott að koma í íslenska flugvél á leið heim og finna kaffi- og matarlyktina og brosandi flugfreyjur, sem bjóða menn velkomna“:
Til Íslands með úrvals „staffi“
ómæld er nægtin vís:
Þær bera fram Bragakaffi
og brauðmeti' að hætti SÍS.
„Skála og syngja Skagfirðingar
Kári Jónsson frá Valadal í Skagafirði (1904-1993) orti þessa vísu við Stafnsrétt í Svartárdal haustið 1934 og hefur hún sennilega verið oftar sungin í Skagafirði en nokkur önnur vísa.
Skála og syngja Skagfirðingar
skemmtun vanda og gera hitt.
Heyrið slyngir Húnvetningar
hér er landaglasið mitt.“
Páll Ólafsson orti „Kappreiðin“:
Ekki prestinn óttast þá
eg né lesta-strákinn
þegar sestur er ég á
allra besta fákinn.
Halldór Blöndal
halldorblondal@simnet.is