Eitt stig en Selfoss samt á toppnum

Besta deildin

Víðir Sigurðsson

vs@mbl.is

Selfosskonur eru einar á toppi Bestu deildar kvenna eftir þrjár umferðir þrátt fyrir að þær yrðu að sætta sig við jafntefli, 1:1, í fyrsta heimaleik tímabilsins gegn Þrótti í gærkvöld. Mikil stemning var á Selfossi fyrir leiknum og um 700 áhorfendur mættir í stúkuna.

* Andrea Rut Bjarnadóttir sló þó örlítið á stemninguna þegar hún kom Þrótti yfir eftir aðeins 65 sekúndur.

* Brenna Lovera skoraði jöfnunarmark Selfoss á 66. mínútu. Hennar fjórða mark í fyrstu þremur umferðunum og Brenna heldur uppteknum hætti frá því í fyrra þegar hún varð markahæst í deildinni.

* Sif Atladóttir lék sinn fyrsta heimaleik með Selfossi og um leið sinn 100. leik í úrvalsdeildinni hér á landi. Hún lék með Val, KR og FH í deildinni frá 2000 til 2009 áður en hún fór í atvinnumennsku. Sif hefur samtals leikið 328 deildaleiki á löngum ferli.

Héldu hreinu í 414 mínútur

Valur stöðvaði Keflvíkinga með öruggum sigri á Hlíðarenda, 3:0, og Keflavíkurliðið tapaði sínum fyrstu stigum og fékk á sig sín fyrstu mörk.

Meira en það því Keflavík hafði ekki fengið á sig mark í deildinni síðan á 3. mínútu í næstsíðustu umferð 2021, einmitt gegn Val. Liðið hafði haldið hreinu í þremur heilum leikjum í millitíðinni.

Samtals liðu 414 leikmínútur frá því Ída Marín Hermannsdóttir skoraði gegn Keflavík í byrjun september og þar til Elísa Viðarsdóttir braut ísinn fyrir Val á 57. mínútu í gærkvöld.

*Ída Marín og Elín Metta Jensen bættu við mörkum á næstu þrettán mínútum og gerðu út um leikinn.

Brooklelyn Ertz og Mariana Speckmaier, nýju bandarísku leikmennirnir hjá Val, fóru beint í byrjunarliðið. Hjá Mariönu var um stutt gaman að ræða, hún fór meidd af velli á 20. mínútu og Elín Metta kom í hennar stað.

Melina þakkaði traustið

Stjarnan tapaði sínum fyrsta leik, 3:0 gegn Breiðabliki á Kópavogsvelli, og Blikar eru því eitt fjögurra liða sem eru komin með sex stig.

Stjarnan vann Breiðablik 3:0 í Lengjubikarnum í vor og margir hafa spáð því að Garðabæjarliðið veiti Val og Breiðablik keppni á þessu tímabili. Miðað við þennan leik eiga Stjörnukonur enn dálítið í land til þess.

*Ástralski framherjinn Melina Ayres var í fyrsta sinn í byrjunarliði Blika og þakkaði fyrir sig með því að skora fyrsta mark leiksins, og sitt fyrsta hér á landi, á 41. mínútu.

* Birta Georgsdóttir bætti við laglegu einstaklingsmarki á 51. mínútu og Ayres skoraði sitt annað mark og þriðja mark Breiðabliks úr vítaspyrnu.

* Hildur Antonsdóttir , miðjumaður Breiðabliks, lék sinn 150. leik í deildinni í gærkvöld.

Fyrsti sigur ÍBV, erfitt hjá KR

ÍBV innbyrti fyrsta sigurinn af talsverðu öryggi gegn KR í Vesturbænum, 2:0. Þriðja tap KR-inga í jafnmörgum leikjum, markatalan 1:11, og brekkan verður þyngri með hverjum leik hjá nýliðunum.

Fyrir mót þótti líklegast að ÍBV og Keflavík yrðu í fallbaráttunni með KR og Aftureldingu en nýju liðin tvö virðast ætla að lenda strax í erfiðri stöðu á botni deildarinnar. KR mætir Breiðabliki og Val í næstu leikjum þannig að útlit fyrir stig á næstunni er ekkert sérstakt.

*Lettneska landsliðskonan Viktorija Zaicikova skoraði fyrra markið. Hennar fyrsta í ár en hún var ein þriggja sem skoruðu sjö mörk fyrir ÍBV í deildinni í fyrra.

* Kristín Erna Sigurlásdóttir innsiglaði sigurinn með sínu fyrsta marki eftir endurkomuna til Eyja en 43 af 46 mörkum hennar í efstu deild hafa verið fyrir ÍBV.