Ísaki halda engin bönd

Fótboltinn

Gunnar Egill Daníelsson

gunnaregill@mbl.is

Alls fóru sex leikir, öll 8. umferðin, fram í Bestu deild karla í knattspyrnu í gær. Þar kenndi ýmissa grasa þar sem Breiðablik er áfram með fullt hús stiga og Ísaki Snæ Þorvaldssyni halda engin bönd, KR jók enn á ófarir FH, afleitt gengi Vals hélt áfram er liðið tapaði þriðja deildarleik sínum í röð, Stjarnan hélt áfram góðu gengi sínu, Íslandsmeistarar Víkings jöfnuðu KA að stigum og Keflavík vann annan leik sinn í röð.

Breiðablik gerði góða ferð í Breiðholtið og lagði botnlið Leiknis úr Reykjavík naumlega, 2:1. Ísak Snær Þorvaldsson kom Breiðabliki yfir eftir tæplega hálftíma leik og skoraði svo annað mark sitt og Blika í upphafi síðari hálfleiks, hans níunda mark í átta leikjum. Róbert Hauksson minnkaði muninn skömmu eftir annað mark Ísaks Snæs en þar við sat og áttundi sigur Breiðabliks í jafnmörgum leikjum þar með staðreynd. Liðið er nú með sjö stiga forskot á toppi deildarinnar. Leiknir er áfram á botninum, þremur stigum frá öruggu sæti.

KR vann þá frábæran 3:2-sigur á FH í Kaplakrika. Kjartan Henry Finnbogason kom KR yfir snemma leiks og tvöfaldaði svo forystuna eftir rúmlega hálftíma leik. Kristinn Freyr Sigurðsson minnkaði muninn skömmu síðar og staðan því 2:1 í leikhléi. Snemma í síðari hálfleik varð Daninn Lasse Petry fyrir því óláni að setja boltann í eigið net eftir fyrirgjöf landa síns Kennies Choparts. Logi Hrafn Róbertsson minnkaði muninn undir lok leiks en eins marks sigur KR niðurstaðan. KR fór með sigrinum upp í 5. sæti deildarinnar en FH, sem hefur gengið bölvanlega á tímabilinu, er í 9. sæti, fjórum stigum fyrir ofan fallsæti.

Valur heimsótti Fram í Safamýrina þar sem heimamenn höfðu betur, 3:2, í stórskemmtilegum leik. Guðmundur Magnússon skoraði tvívegis fyrir Fram og Ágúst Eðvald Hlynsson sömuleiðis fyrir Val áður en Jannik Pohl skoraði sigurmark Framara, sitt fyrsta deildarmark fyrir liðið. Fram fór upp um tvö sæti, í 8. sæti, með sigrinum og er nú fimm stigum fyrir ofan fallsæti. Valur er hins vegar komið niður í 6. sæti eftir að hafa byrjað tímabilið frábærlega.

Óli Valur Ómarsson skoraði sigurmark Stjörnunnar í 1:0-sigri á ÍBV og kom liðinu þannig upp í 2. sæti deildarinnar á meðan ÍBV er enn í fallsæti. Markið hans var sérlega glæsilegt, magnað einstaklingsframtak sem lauk með hnitmiðuðu skoti niður í nærhornið.

Víkingur úr Reykjavík fékk KA í heimsókn og hafði naumlega betur, 2:1, eftir mikla dramatík í blálok leiks. Ari Sigurpálsson hafði komið Víkingi yfir áður en Nökkvi Þeyr Þórisson jafnaði metin fyrir Akureyringa seint í leiknum. Viktor Örlygur Andrason skoraði hins vegar sigurmark Víkinga á annarri mínútu uppbótartíma. Víkingur er nú í 4. sæti með 16 stig líkt og KA, sem fór niður í 3. sæti.

Keflavík gerði frábæra ferð á Skipaskaga þegar liðið vann 2:0-sigur á heimamönnum í ÍA. Dani Hatakka og Kian Williams skoruðu hvor í sínum hálfleiknum og kom Keflavík þar með upp í 7. sæti. ÍA er hins vegar áfram í 10. sæti, aðeins þremur stigum fyrir ofan fallsæti.

Tvískipt deild

Að átta umferðum loknum í Bestu deildinni eru línur farnar að skýrast að langmestu leyti. Með nýju fyrirkomulagi munu sex efstu liðin taka þátt í umspili um Íslandsmeistaratitilinn og sex neðstu liðin taka þátt í fallumspili. Blikar eru í algjörum sérflokki en næstu fimm lið á eftir koma svo í einum hnapp þar sem aðeins fjögur stig skilja á milli Stjörnunnar, KA, Víkings, KR og Vals.

Keflavík er aðeins að gera sig gildandi í 7. sætinu og er aðeins þremur stigum á eftir Val en sjö stig FH í 9. sætinu teljast gífurleg vonbrigði fyrir Hafnarfjarðarliðið. Leiknir og ÍBV bíða þá enn eftir sínum fyrstu sigrum og því allt útlit fyrir afar erfitt sumar fyrir bæði lið.