Stjörnukonur styrktu stöðuna með sigri

Besta deildin

Víðir Sigurðsson

vs@mbl.is

Stjarnan er komin í þriðja sæti Bestu deildar kvenna í fótbolta eftir góðan útisigur á Þrótturum í Laugardal, 1:0, í gærkvöld.

Mikið var í húfi hjá báðum liðum því Þróttarar hefðu með sigri komist á topp deildarinnar í fyrsta skipti í sögunni.

Nú eru hinsvegar Valskonur áfram á toppnum og geta aukið forskot sitt í dag þegar þær taka á móti ÍBV.

Stjörnukonur hafa unnið þrjá leiki í röð og gáfu til kynna með þessum sigri að þær ætluðu sér að vera með í baráttunni í efri hlutanum.

* Gyða Kristín Gunnarsdóttir kom Stjörnunni yfir í uppbótartíma fyrri hálfleiks með laglegu skoti eftir góðan undirbúning Katrínar Ásbjörnsdóttur .

Sex mörk Breiðabliks

Afturelding tapaði í sjötta sinn í fyrstu sjö umferðunum og ljóst er að róður nýliðanna í deildinni ætlar að verða afar þungur.

* Taylor Ziemer og Birta Georgsdóttir komu Blikum í 2:0 á fyrstu 22 mínútum leiksins.

*Eftir að Hildur Karitas Gunnarsdóttir gerði leikinn spennandi í tvær mínútur skoruðu svo Natasha Anasi , hin úkraínska Anna Petryk , Alexandra Jóhannsdóttir og Clara Sigurðardóttir fyrir Blika. Alexandra skoraði þar sitt 30. mark í efstu deild hér á landi og Clara skoraði sitt fyrsta mark í deildinni fyrir Breiðablik.

* Sólveig Larsen úr Aftureldingu fékk rauða spjaldið í uppbótartíma leiksins fyrir mótmæli við dómara leiksins og verður í banni í næsta leik.

Fimm mörk á Akureyri

Eftir óskabyrjun í deildinni hafa Keflavíkurkonur aðeins fengið eitt stig í síðustu fimm leikjum sínum.

* Hulda Ósk Jónsdóttir lagði upp tvö fyrstu mörkin fyrir Tiffany McCarty og Söndru Maríu Jessen . Tiffany lagði síðan upp þriðja mark Þórs/KA fyrir Margréti Árnadóttur en Akureyrarliðið komst í 2:0 og 3:1. Sandra, Tiffany og Margrét hafa skorað 12 af 13 mörkum Þórs/KA í deildinni.

* Vigdís Lilja Kristjánsdóttir og Caroline Van Slambrouck skoruðu mörk Keflavíkur, báðar með sitt fyrsta mark fyrir félagið. Caroline skoraði síðasta mark leiksins með miklum þrumufleyg af 25 metra færi.

*Síðasta leik gærkvöldsins milli Selfoss og KR var ólokið þegar blaðið fór í prentun en fjallað er um hann eins og hina leikina á síðunni Íslenski fótboltinn á íþróttavef mbl.is. Selfoss var yfir, 3:1, með mörk Miröndu Nild , Brennu Lovera og Barböru Sól Gísladóttur en Bergdís Fanney Einarsdóttir svaraði fyrir KR.

*Sjöundu umferðinni lýkur síðan í dag þegar Valur tekur á móti ÍBV á Hlíðarenda klukkan 17.