Steinþór Stefánsson
steinthors@mbl.is
Emmanuel Macron, forseti Frakklands, sækist eftir því að vinna hreinan meirihluta á þingi í kosningum sem nú fara fram þar í landi.
Í gær fór fram fyrri af tveimur umferðum þingkosninganna, en kosið er um 577 sæti í neðri deild franska þingsins. Niðurstöðu þessarar fyrri umferðar má vænta í dag en síðari umferðin fer fram eftir um það bil viku, það er að segja 19. júní næstkomandi.
Vill hreinan meirihluta
Macron, sem hefur nýlega verið endurkjörinn í embætti forseta, stendur frammi fyrir sameinaðri vinstriblokk sem skoðanakannanir hafa sýnt fram á að gæti svipt Macron hreinum meirihluta á þingi. Frönsku vinstri flokkarnir þrír mynda umrædda vinstriblokk sem gengur undir heitinu NUPES og fer Jean-Lucs Melenchon með forystu bandalagsins.Mikið er undir fyrir Macron að fá hreinan meirihluta á þingi en hann ætlar sér að ráðast í ýmsar umbætur, þ.ám. umbætur í lífeyrismálum sem hann segir nauðsynlegar til að koma ríkisfjármálum Frakklands í lag. Andstæðingar hans til vinstri vilja hins vegar lækka lífeyrisaldurinn og ráðast í umfangsmikil útgjöld.
Lítil kjörsókn í fyrri umferð
Kjörsókn á meginlandi Frakklands í gær mældist 39,4% um þrjúleytið og var hún sú minnsta sem mælst hefur síðastliðin tuttugu ár í fyrri umferð þingkosninga.Búist er við að kjörsókn verði betri í annarri umferð sem fer fram næstkomandi sunnudag.
Fyrstu spár eftir nýafstaðnar forsetakosningar sýndu að Macron væri á góðri leið að ná meirihluta á þingi. En forsetinn hefur komið lítið fram eftir forsetakosningarnar. Vinstrimanninum Jean-Luc Melenchon hefur aftur á móti tekist að mynda kosningabandalag.
Nýjustu spár sýna nú fram á að væntingar forsetans um hreinan meirihluta gætu mögulega ekki gengið eftir þar sem kannanir sýna að Macron myndi vanta 40 sæti á þingi.
Til þess að ná hreinum meirihluta þyrfti Macron að ná 289 mönnum inn.
Til baka
Leita í greinasafni
Prenta grein