Edith Wilson er oft sögð fyrsta konan sem gegndi embætti forseta. Á annað ár hittu aðeins hún og læknir Wilsons hann að máli

Joe Biden, forseti Bandaríkjanna, kemur æ oftar í ljós frétta úr ólíkindaátt, þótt umsjónarmenn hans í Hvíta húsinu reyni frá morgni til kvölds að hindra að nokkur sleppi of nærri honum nema þrælkannaður og vottaður sem innvígður í flokk demókrata.

Gildir þar einu þótt þorri upplýsingagátta þessa mikla lands sé, svo er með nokkrum ólíkindum, rækilega beintengdur flokki demókrata og sjái hvorki né heyri neitt sem gæti hugsanlega komið flokknum illa. En þessi ævintýralegi undirlægjuháttur er þó farinn að verða samansúrraðri fréttaklíkunni erfiðari, eftir því sem logar á færri kertum á toppi tertunnar stóru, sem flestallt snýst um í þessu mikla landi.

Nýlega var liðið á fjórða mánuð án þess að nokkur hefði mátt eiga og sjónvarpa tveggja manna viðtali við forsetann. Þetta er ekki bara orðið pínlegt heldur nánast óverjandi. Nú bætist við, að stækkandi hópur innvígðra, sem kalla sem fjölmiðlamenn ekki allt ömmu sína í pólitískri tilhliðrun, er orðinn feimnari við að taka þátt í margæfðum leikþætti með forsetanum um óundirbúið viðtal(!), því alls ekki er öruggt að ganga megi að því vísu að forsetinn fari ekki út af, þótt engin sé lausamölin og allt þrælheflað.

Sumir þessara jafnvel heimsfrægu pólitísku hjálparkokka á fjölmiðlunum, sem nær allir eru á vinstri kantinum, rétt eins og á „RÚV“ hjá okkur, en fara betur með það og eru ekki eins heimóttarlegir og í Efstaleiti, telja nú að meintum heiðri sínum sé teflt í tvísýnu andspænis þessari dauðans óvissu sem viðtal við Biden er uppskrift að.

Loks var þó „spyrjanda“ hleypt að Biden sem talið var öruggt að myndi nálgast forsetann eins og hann væri að svæfa ungbarn. Mátti þó frekar kalla hann skemmtikraft en alvöru spyrjanda, og gæti slegið slík stef ef stefndi í stórslys í útsendingunni.

Biden hefur komið sér upp nýrri tækni, sem er umsjónarmönnum og velvildarliðinu snúin. Hann er tekinn að svara spurningum sem spyrjandinn er ekki kominn að, eða ætlaði sér að hafa með öðrum hætti, eða forðast sem heitan eldinn.

Þetta afbrigði hefur bæst við aðra tækni Bidens að fara af stað með svar við spurningu, en enda á miðju vaði og snúa sér rétt einu sinni að allt öðru eins og margleiðréttri sögu svo sem um það þegar hann bjargaði Mandela forseta úr rammgerðu fangelsi eða eitthvað enn verra. En einhver sem áhorfandinn sér ekki á skerminum veifar þá aðvörunarspjöldum í ofboði og Biden snýr sér þá í einhvers konar hring og segir eitthvað í þá veru að „hitt sé svo annað mál“ sem andstæðingar hans muni aldrei komast upp með að afneita. Þá taki hann fast á móti.

Síðasti þáttarspyrjandi Bidens hafði þann hátt á í vandræðum að samsinna „niðurstöðunni“ skælbrosandi og þakklátur yfir snilldinni og botnaði hana með gömlum gamanmálum höfðum eftir Biden sjálfum sem hann naut að heyra á ný.

Má ímynda sér að hratt gangi á svitakremsbirgðir þeirra sem halda utan um Biden við þessar aðstæður. En setning sem situr eftir frá sl. föstudegi var ekki sögð við undirbúnar aðstæður. Hún var óvænt fullyrðing Bidens í námunda við tilfallandi fréttamenn um að Selenskí forseti Úkraínu hefði brugðist illa við aðvörunum sínum, sem forseta Bandaríkjanna, um að innrás Rússa í Úkraínu væri að hefjast. „Forseti Úkraínu vildi alls ekki heyra þessar aðvaranir frá Bandaríkjunum áður en til innrásar væri komið,“ og sagði að Selenskí hefði þarna orðið á alvarleg mistök. Biden bætti því við „að fjöldi manna taldi að ég færi með ýkjur, þegar ég sá þetta fyrir“.

Þeir sem fylgdust með málum muna það vel sem Biden ýjar að. Hann var spurður um það af blaðamanni hvort Pútín myndi gera árás á Úkraínu. „Já,“ svaraði Biden án þess að gera nánari grein fyrir því. En spurður um frekari viðbrögð tók hann að bollaleggja um að léti Pútín sér nægja að gera „minniháttar innrás,“ þá gætiorðið ástæðulaust að gera veður út af því!

Vegna þessa, og þá ekki síst hins síðara, varð nokkurt uppistand. Höndlarar Bidens ruku til að kynna réttan skilning á því hvað Biden hefði átt við, bæði varðandi „já“ við spurningu um innrás og hugtakið um ásættanlega árás Pútíns! Hvorugt stóð eftir þegar hreingerningunni lauk og Biden gerði ekki minnstu tilraun til að standa með sinni fullyrðingu. Fyrr en nú.