Slippurinn Hluti athafnasvæðis Slippsins á Akureyri. Þar hefur verið nóg að gera að undanförnu og góð verkefnastaða næstu mánuði.
Slippurinn Hluti athafnasvæðis Slippsins á Akureyri. Þar hefur verið nóg að gera að undanförnu og góð verkefnastaða næstu mánuði. — Morgunblaðið/Margrét Þóra
Annríki Hvert skipið á fætur öðru hefur komið til viðhalds í slippnum á Akureyri undanfarnar vikur og hefur heilmikil törn staðið yfir þar.
[ Smellið til að sjá stærri mynd ]
Margrét Þóra Þórsdóttir Akureyri „Það er alltaf heilmikil törn hjá okkur á vorin og fram á sumar, í maí, júní og júlí, og það er engin undantekning á því í ár,“ segir Sveinbjörn Pálsson, sviðsstjóri hjá slippnum á Akureyri.

Margrét Þóra Þórsdóttir

Akureyri

„Það er alltaf heilmikil törn hjá okkur á vorin og fram á sumar, í maí, júní og júlí, og það er engin undantekning á því í ár,“ segir Sveinbjörn Pálsson, sviðsstjóri hjá slippnum á Akureyri. Hvert skipið á fætur öðru hefur verið í viðhaldi hjá slippnum og fleiri væntanleg á næstunni.

„Kvótaárið ræður miklu um hvenær útgerðir senda skipin í viðhald. Flestir eru búnir eða langt komnir með kvótann í sumarbyrjun og þá hentar vel að sinna viðhaldi og vera klár í slaginn áður en næsta kvótaár hefst 1. september. Á vorin og í byrjun sumars streyma uppsjávarskipin einnig til okkar, en þau hafa þá lokið veiði á einum stofni og stefna á næstu veiðar,“ segir Sveinbjörn.

Um þessar mundir eru þrjú uppsjávarveiðiskip á svæðinu en einnig er að ljúka stóru verkefni sem hófst um áramót á tveimur skipum sem keypt voru frá Færeyjum en stefna nú til Frakklands undir nýjum nöfnum. Skipin heita Fisher Bank og hefur þegar hafið veiðar og Otter Bank.

Mörg handtökin

Sveinbjörn segir að hannað hafi verið og smíðað nýtt vinnsludekk hjá slippnum í bæði skip sem og lagfæringar á ýmsum öðrum þáttum, viðhaldsviðgerðir á stáli og klæðning í lest sem dæmi. Gert er ráð fyrir að klára þetta verkefni í lok júnímánaðar. Sveinbjörn nefnir að nú sé unnið að viðhaldi á Aðalsteini Jónssyni SU frá Eskifirði, Venus NS frá Vopnafirði er einnig í slipp sem og Hákon EA. „Það eru alls konar verk sem verið er að vinna í þessum skipum en öll verða þau máluð. Skipin eru með þeim stærri sem finnast í íslenska skipaflotanum og handtökin því mörg,“ segir hann.

Málað á nóttunni

Málningarvinna hefst að jafnaði eldsnemma morguns til að nýta tímann sem best. „Við erum að byrja oft fjögur til fimm á nóttunni og það gengur ágætlega upp á þessum bjartasta tíma ársins.“

Í næstu viku er Málmey SK á leið í slipp sem og Harðbakur EA og þá er Egill SH frá Ólafsvík í vélarskiptum.

Hann segir mönnunarstöðu góða, en hjá slippnum starfa nú um 20 farandverkamenn auk fastráðinna starfsmanna, sumarstarfsmanna og samningsbundinna nema í vélvirkjun og stálsmíði.