Ekki þarf að koma neinum á óvart að Sara Björk hafi verið eftirsótt af Juventus og fleiri stórliðum, þar á meðal Chelsea og Manchester United, enda hefur hún þegar leikið fyrir tvö af stærstu félögum Evrópu, Lyon og Wolfsburg, á ferli sínum.
Reynsla Söru Bjarkar yfir höfuð, og þá ekki síst í Meistaradeild Evrópu, sem hún vann með Lyon á síðasta tímabili og einnig árið 2020, hefur eflaust átt stóran þátt í áhuga Juventus á henni.
Juventus er , eins og rakið er hér við hliðina, á stöðugri uppleið og náði sínum besta árangri í Meistaradeildinni í stuttri sögu félagsins á síðasta tímabili, er það féll naumlega úr leik gegn Söru Björk og stöllum í Lyon í fjórðungsúrslitum.
Eðlilega vill Juventus fara enn lengra í keppninni á næstu árum og ekki yrði ég hissa ef Sara Björk hjálpar liðinu í þeim efnum.
Sara Björk er sem kunnugt er í sambandi með Árna Vilhjálmssyni. Hann er einnig atvinnumaður í knattspyrnu hjá franska B-deildarliðinu Rodez, þar sem hann er samningsbundinn til tveggja ára til viðbótar.
Þar sem þau eru í sambúð og eiga barn saman, leiðir Árni væntanlega hugann að því að finna sér nýtt félag, og það þá helst á Norður-Ítalíu.
Nóg er af félögum í ítölsku B og C-deildunum sem eru staðsett á Norður-Ítalíu og því ættu möguleikar að vera fyrir hendi hjá Árna. Hvernig sem það allt saman æxlast, vonar maður auðvitað að þeim verði gert kleift að búa saman sem fjölskylda.
Til baka
Leita í greinasafni
Prenta grein