Húsbukkur kom til landsins nú í júní

Húsbukkur (Hylobates bajulus) er tegund trjábukka sem berst af og til hingað til lands. Það gerðist einmitt nýlega, þegar einn slíkur fannst í Reykjavík. Honum var komið til Náttúrufræðistofnunar Íslands, þar sem honum er til haga haldið. Líklegt er að hann hafi komið með pakkningum erlendis frá. Frá þessu greinir Erling Ólafsson skordýrafræðingur á fésbókarsíðu sinni, Heimur smádýranna. Þar kemur fram að trjábukkar finnist ekki í náttúru Íslands en ein tegund þeirra gæti þó mögulega þrifist hér á landi, fyrrnefndir húsbukkar. Þeir lifa í trjáviðum gamalla húsa og getavaldið á þeim skemmdum. „Lirfurnar vaxa upp inni í gömlum viðum húsa, einkum stoðum og bitum í burðarvirkinu. Það tekur þær mörg ár að ná fullum þroska og skila sér út úr viðunum sem fullþroska bjöllur. Tegundin er hitakær og þarf helst um og yfir 25°C hita í viðnum til að nærast og dafna,“ segir Erling. Hann tekur fram að vegna þessa hafi hann litla trú á að trjábukkurinn geti sest að í húsum hér á landi, fest sig í sessi og orðið til vandræða.